Presidentja Vjosa Osmani ka fajësuar autoritetet në Beograd për dorëheqjet e fundit të zyrtarëve serbë nga Policia e Kosovës. Ajo ka thënë se frikësimi dhe shantazhi i strukturave të Beogradit kanë pasur gisht në këto dorëheqje.
Këto komente e para e shtetit i ka bërë në konferencën për media pas takimit me kryetarin e Komunës së Klinës, Zenun Elezaj.
“Momenti i fundit kur i numërova numri i dorëheqjeve kishte shkuar deri në 7. Sipas hetimeve të institucioneve tona kjo ka ardhur si pasojë e frikësimit e shantazhimit ndaj tyre nga Serbia. Ky shtet fatkeqësisht po vazhdon me agresion të hapur ndaj Kosovës. Po vazhdojnë që me institucionet e veta ilegale në Kosovë t’i bëjnë shantazh qytetarëve serbë, të cilët janë pro integrimit. Veprimet e tilla janë shkelje flagrante të marrëveshjeve të parapara, pres nga BE që të ndërmarrë veprime ndaj Serbisë dhe Vuçiqit për shkeljet e marrëveshjes së Brukselit por edhe për shkeljet e standardeve ndërkombëtare”, ka thënë Osmani.
Tutje ajo ka thënë se autori i vetëm i këtyre dorëheqjeve është Serbia.
“Ma kanë konfirmuar në çdo takim që presioni ndaj policëve serb vjenë nga strukturat e tyre paralele, autori është në Beograd”, ka thënë ajo.
Presidentja ka folur edhe për takimin të cilin e mbajti me kryetarin Elezaj në vazhdën e vizitave nëpër komunat e Kosovës. Një nga temat e takimit ishte parandalimi i vërshimeve si dhe ruajtja e bukurive natyrore siç është Ujëvara e Mirushës. Osmani u shpreh se kjo pjesë si një prej atraksioneve më të rëndësishme të vendit, ka nevojë për më shumë investime.
“Diskutuam edhe për projekte të rëndësishme infrastrukturore, siç është rruga e Tranizitit, do të tentojmë që t’i shtyjmë përpara këto projekte”, ka premtuar Osmani.
Tutje ajo potencoi se takimet me kryetarët e komunave po ndodhin në mënyrë që të kuptojnë problematikat e qyteteve, të cilat mund t’i zgjedhin nëpërmjet projekteve të përkrahura nga partnerët ndërkombëtar.
“Diskutimet tona në këtë cikël janë edhe në përgatitje të projekteve konkrete që ne si Presidencë bashkë me kryetarët e komunave do të prezantojmë para partnerëve tonë”, ka deklaruar Osmani.
