Në Prishtinë është mbajtur konferenca e 3-të e radhës e organizuar nga KSAVA, OVK dhe AUV, me të ftuarin e veçantë nga Amerika, veterinerin më të njohur në botë për kafshët e shoqërimit DR. JEFF – Dr. Jeffrey Young nga klinika e tij në Denver – “Planned Pethood International”.
Kjo konferencë për kryefjalë kishte dinamikën e kontrollit të popullsisë së qenve të rrugës me një mesazh kastrimi/sterilizimi ende shpëtojnë jetë-jo vrasjes, kontradikta vazhdon.
Kryetari i KSAVA, Dardan Pozhegu, në hapje të kësaj konference falënderoj gjithë pjesëmarrësit jo vetëm me prezencën e tyre, por edhe mbështetjen në organizimet që kanë të bëjnë me fushën e mjekësisë veterinare dhe në veçanti të kafshëve të shoqërimit.
“Dua të falënderojë kolegët bashkëpunëtorët që më ndihmojnë dhe na ndihmojnë që këto organizimet të jenë sa ma të lehta dhe efikase, po ashtu kërkojmë dhe nga ju që të na kritikoni e ne të përmirësohemi që këto organizime të jenë në nivelin sa ma të lartë”, tha Pozhegu, duke i shprehur një falënderim të thellë për pjesëmarrjen në këtë konferencë të DR. Jeffrey Young i cili është veterineri më i njohur në botë i kafshëve shoqëruese.
Duke u ndërlidhur me problemin e trajtimit të qenve endacak, Xhevdet Krasniqi, kryetar i OVK-së, ai kërkoi që më shumë dhe sa më shpejtë të trajtohet kjo çështje edhe në praktikë.
“U jam shumë falënderues dhe mirënjohës që keni shpreh gatishmërinë të vini për një trajnim të tillë, ku në të ardhmen do të merreni edhe ju në mënyrë sa më profesionale për ta kryer këtë punë. E di që çdo ditë secili prej jush has në komunikacion viktima të qenve. Unë sot nga rruga që erdha nga Shtimja për në Lipjan, e hasa një qen, përafërsisht rreth 40 kilogramësh që ishte aksidentuar dhe përfunduar me fatalitet. Këtë çështje duhet ta trajtojmë sa më shpejt që është e mundur. Të gjithëve ju lus që të keni në konsideratë dhe të merrni me trajtimin sa më të mirë të qenve”, tha ai.
E ligjëruesi i sotshëm, Jeffrey Young, që njihet si Dr. JEFF, teksa ka treguar për temat që do t’i shpjegoj, ka falënderuar veterinerët për pjesëmarrje, njëherësh duke shpresuar se do të mësojnë gjëra të reja dhe t’i aplikojnë ato në terren.
Veterineri Shaban Mehmeti, e cilësoi këtë konferencë si një lloj trajnimi mjaft të domosdoshëm për veterinerë, veçanërisht me prezencën e z. Jeff që ka përvojë jo vetëm në shtetet e zhvilluara, por edhe mesatare edhe pak më të ulët siç është Kosova.
“Mendoj që pozitivja për të kuptuar të gjithë është që eutanazia nuk qenka mjet për me kontrolluar popullsinë, mirëpo është një mjet human që veterinerët vendosin për raste të caktuara, për shëndetin e tyre, sepse u shkaktojnë veç vuajtje”, tha ai.
Përndryshe, tha Mehmeti, kjo konferencë është e organizuar në nivel shumë të mirë me pjesëmarrjen edhe të KSAVA-s, OVK-së, veterinerëve, një pjesë e kolegëve shumë të respektueshëm.
“Mendoj që disa veterinerë që nuk kanë ardhur, ndoshta kanë pasur arsye, por nuk është mirë me i neglizhuar këto, sepse edhe vet fakti që bashkohemi si komunitet, këmbejmë eksperienca, përvojat tona, hallet e tona dhe kjo është në dobi të veterinës së Kosovës. Veterina po ecë përpara në Kosovë dhe ne jemi këtu për te”, tha Mehmeti.
Në fund të trajnimit, pjesëmarrësit u pajisën me certifikata.
Nesër, e që është dita e dytë e trajnimit, do të mbahet pjesa praktike. /Kosovatimes/
