Një person ka humbur jetën mëngjesin e sotëm si pasojë e një vetaksidenti në autostradën “Ibrahim Rugova”. Rastin e ka konfirmuar zëdhënësi i Policisë së Kosovës, Baki Kelani.
“Rreth orës 06:10, në autostradën Ibrahim Rugova në km 24 drejtimi i Vërmicës, ka ndodhur një vet aksident me lëndime trupore, ku një automjet Suzuki me targa lokale me vozitës mashkull kosovar, dyshohet se ka humb drejtimin dhe është rrokullisur në rrugë, me ç ‘rast lëndime trupore kanë pësuar dy persona, e njeri prej të cilëve më vonë ka ndërruar jetë”, ka theksuar Kelani.
Ai ka bërë të ditur se në vendin e ngjarjes kanë dalë patrulla policore, njësia e hetimeve dhe kompania për mirëmbajtjen e rrugës, derisa lidhur me rastin është njoftuar edhe prokurori kujdestar dhe janë marrë të gjitha veprimet e nevojshme policore.
Pas këtij aksidenti me fatalitet Kelani ka bërë edhe një apel për të gjithë pjesëmarrësit në trafik.
“Policia e Kosovës vazhdon të apelojë te të gjithë pjesëmarrësit në trafik që të kenë kujdes më të shtuar, të respektojnë rregullat e trafikut dhe të ju përmbahen kushteve të rrugës, në mënyrë që të gjithë së bashku të kontribuojmë për një siguri më të madhe në trafik dhe në parandalim të aksidenteve”, ka shtuar Kelani.
