Piloti i helikopterit rus Mi-8 Maksim Kuzminov (28) do të marrë një shpërblim prej 500,000 dollarë në hryvnia, monedha kombëtare e Ukrainës. Oficerët e inteligjencës ukrainase u bënë thirrje rusëve të tjerë që të ndjekin shembullin e tij, transmeton Klix.
“Ai do ta marrë atë në monedhën kombëtare, natyrisht.” Ekziston një ligj zyrtar i nënshkruar nga Presidenti i Ukrainës në prill 2022, për kompensimin e duhur kur një person kalon në anën e Ukrainës dhe merr pajisje ruse me vete”, tha Andrii Yusov, një përfaqësues i shërbimit të inteligjencës së mbrojtjes të Ukrainës.
Ai shtoi se Ukraina është një shtet demokratik dhe kushtetues që përmbush detyrimet e veta dhe respekton ligjin ndërkombëtar dhe se rusët që nuk duan të bëhen kriminelë lufte mund të dorëzohen, të shkojnë në anën e Ukrainës dhe kështu të mbrojnë dinjitetin dhe ndërgjegjen e tyre.
Më 23 gusht, u zbulua se një helikopter Mi-8 i forcave të armatosura ruse përfundoi në Ukrainë si rezultat i një operacioni special të gjatë të shërbimit të inteligjencës ukrainase.
Piloti dhe familja e tij janë në Ukrainë, familja e tij u largua nga Rusia më herët. Mi-8 mbeti në Ukrainë, ashtu si edhe komponentët e avionëve luftarakë që supozohej t’u dorëzonte rusëve.
Në një konferencë për shtyp më 5 shtator, Kuzminov zbuloi detaje të reja të operacionit special, duke thënë se për mundësinë e dorëzimit me helikopter ka dëgjuar fillimisht nga policia. Më pas në operacion u përfshi edhe shërbimi i inteligjencës së mbrojtjes.
