Vetëm 10 për qind e qytetarëve të Kosovës mendojnë se sektori i drejtësisë ka shënuar përmirësime gjatë viteve të fundit, ndërsa 36 për qind mendojnë se nuk ka kurrfarë përmirësimi në këtë sektor. Ndërkaq 44 për qind e qytetarëve të anketuar mendojnë se në drejtësi ka përmirësime relative. Këtë të dhëna kanë dalë nga një raport që ka publikuar të martën Instituti Demokratik i Kosovës (KDI).
Në konferencën e mbajtur sot, KDI prezantoi rezultatet e një hulumtimi të opinionit publik, që pasqyron këndvështrimin e qytetarëve të Kosovës mbi reformën në sistemin e drejtësisë.
Gjatë shpalosjes së të dhënave, Violeta Haxholli nga KDI, sqaroi se hulumtimi vë në pah këndvështrimin e qytetarëve rreth performancës së sektorit të drejtësisë, konkretisht punën e prokurorive dhe gjykatave. Pastaj, pritjet e qytetarëve për përmirësime në këtë sektor, institucionet përgjegjëse për reforma në këtë sektor si dhe mundësitë e qytetarëve për t’u përfshirë në këtë reformë, sqaroi ajo.
Në pyetjen nëse qytetarët janë pyetur se kur presin përmirësim në sektorin e drejtësisë, konkretisht në punën e prokurorive dhe gjykatave, sipas Haxhollit, vetëm 8% e qytetarëve presin përmirësime gjatë këtij viti, ndërsa shumica presin përmirësime gjatë 5 ose 10 viteve të ardhshme.
Haxholli vijoi prezantimin e të dhënave me pyetjen që u është parashtruar qytetarëve se kush ka përgjegjësi për të reformën në drejtësisë, një përqindjen më të lartë konkretisht 36%, sipas saj, janë të mendimit se përgjegjësinë kryesore e ka vet institucioni i drejtësisë, ndërsa 34 për qind mendojnë se përgjegjëse është qeveria.
“Lidhur me atë se a janë të informuar qytetarët për mundësitë e tyre për të marrë pjesë në diskutime gjatë hartimit/shqyrtimit të projektligjeve për reformimin e sektorit të drejtësisë, në përqindje shumë të lartë, me 77%, qytetarët janë shprehur se nuk janë të informuar. Vetëm 17% e tyre janë shprehur se e kanë këtë informacion”, tha Haxholli.
Ndërsa në pyetjen e fundit qytetarët janë pyetur edhe lidhur me preferencat e tyre për t’u përfshirë në procesin e shqyrtimit të projektligjeve të reformës në drejtësi. “Lidhur me këtë çështje, 76% e qytetarëve janë deklaruar se nuk preferojnë të përfshihen në këtë proces. Në anën tjetër 18% e tyre janë shprehur se preferojnë të përfshihen përmes pjesëmarrjes në diskutime publike”, tha ajo.
Ndryshe, në këtë hulumtim të opinionit publik është realizuar nga 4 deri me 13 shtator të këtij viti, me 1065 respodentë të moshës mbi 18 vjet.
