Bashkëpunimi i frytshëm mes Kosovës dhe Luksemburgut, vijoi me mbledhjen e 8-të të mbajtur online të Komisionit Bilateral mes dy vendeve tona. Kosova përfaqësohej nga Zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi, shoqëruar dhe nga Ministrja e Ekonomisë, Artane Rizvanolli, ndërsa pala e Luksemburgut nga z. Franz Fayot, Ministër për Bashkëpunim për Zhvillim dhe Çështje Humanitare dhe Ambasadori i Luksemburgut në Kosovë, Eric Dietz.
Ministri Fayot, fillimisht shprehu ngushëllime për policin e rënë në krye të detyrës në sulmin terrorist të 24 shtatorit, Heroin e Republikës së Kosovës, Afrim Bunjaku, dhe përgëzoi punën e policisë dhe të institucioneve të Republikës së Kosovës.
Zëvendëskryeministri Bislimi e falënderoi ministrin për mesazhin e tij. Ndërkohë në kuadër të mbledhjes, ai tha se Plani Kombëtar për Zhvillim duhet të na shërbejë si udhërrëfyes për harmonizimin e projekteve. Po ashtu, këto projekte dhe të tjera të financuara nga donatorët në bashkëpunim me Qeverinë e Republikës së Kosovës duhen fuqizuar në koordinim e sinergji më të mirë.
Pas një bashkëpunimi të mirë në mes të institucioneve të Republikës së Kosovës dhe Dukatit të Madh të Luksemburgut, së bashku edhe me Ambasadën e saj në Prishtinë, është arritur dhe hartimi i 4 projekt-propozimeve që do të financohen nga marrëveshja e vitit 2022-2025.
Kjo Marrëveshje është vazhdimësi e aktiviteteve të bashkëpunimit zhvillimor të zbatuara deri më sot, por shënohet edhe nga një diversifikim i bashkëpunimit me Kosovën, duke integruar më tej një lidhje me sektorin privat në Kosovë dhe atë në Luksemburg. Programet e reja synojnë veçanërisht të mbështesin fushat e shëndetësisë; trajnimin profesional; rritje gjithëpërfshirëse dhe të qëndrueshme; si dhe shoqërinë civile.
Projektet ofrojnë mbështetje për qeverisjen, zbatimin e politikave, programeve dhe iniciativave për zhvillimin e punësimit, sektorit privat dhe sektorit të inovacionit dhe kërkimit.
Ndërkaq, Ministrja e Ekonomisë, Artane Rizvanolli, njoftoi për punën dhe prioritetet e ministrisë, duke theksuar objektivat në zhvillimin e Energjisë së Ripërtëritshme.
Në këtë takim po ashtu u bë dhe prezantimi i të arriturave të projekteve të kaluara dhe prezantimi i të priturave nga projektet 2022-2023. /Kosovatimes/
