Presidenti turk Rexhep Tajip Erdogan tha se sulmet “disproporcionale dhe të pabaza” të Izraelit në Gaza mund të çojnë në dëmtimin e reputacionit të tij ndërkombëtar, raporton Anadolu.
“Sulmet disproporcionale dhe të pabaza ndaj Gazës mund ta sjellin Izraelin në një vend të papritur dhe të padëshirueshëm në sytë e publikut botëror,” tha Erdogan të mërkurën, duke folur në një takim të Klubit të deputetëve të Partisë për Drejtësi dhe Zhvillim (AK Parti) në Turqi. “Bombardimi i vendbanimeve civile, vrasja e qëllimshme e civilëve, bllokimi i automjeteve (që) sjellin ndihma humanitare në rajon dhe përpjekja për t’i paraqitur të gjitha këto si aftësi mund të jetë vetëm një refleks i një organizate (terroriste), jo të shtetit,” tha Erdogan, duke shtuar :”Izraeli nuk duhet të harrojë se nëse vepron si një organizatë dhe jo si një shtet, do të përfundojë duke u trajtuar si një organizatë.”
Lidhur me konfliktin izraelito-palestinez që shpërtheu në fund të javës së kaluar, Erdogan tha se “Turqia nuk e konsideron të justifikuar asnjë veprim kundër civilëve apo ndonjë sulm që synon vendbanimet civile”.
“Konflikti që po bëhet me të gjitha llojet e metodave të turpshme nuk është luftë, por masakër ”, nënvizoi presidenti Erdogan.
Erdogan shtoi se të gjithë duhet të qëndrojnë larg vendimeve impulsive që synojnë ndëshkimin e plotë të popullit palestinez, siç është ndërprerja e ndihmës humanitare.
“Turqia kundërshton vrasjen e civilëve në territorin izraelit,” tha presidenti turk Erdogan, duke shtuar se “Ankara nuk e pranon kurrë “masakrën pa dallim” të të pafajshmëve në Gaza.
Në një përshkallëzim dramatik të tensioneve në Lindjen e Mesme, forcat izraelite kanë nisur një fushatë të qëndrueshme dhe të fuqishme ushtarake kundër Rripit të Gazës, në përgjigje të një ofensive ushtarake të grupit palestinez Hamas në territoret izraelite.
Konflikti filloi të shtunën kur Hamasi nisi Operacionin Aqsa Flood kundër Izraelit, një sulm i befasishëm i shumëfishtë që përfshin një breshëri lëshimesh raketash dhe infiltrim në Izrael nga toka, deti dhe ajri, për të cilin Hamasi thotë se ishte në hakmarrje për sulmin në Al- Aksa në Kudsin Lindor të pushtuar (Jeruzalem) dhe dhuna në rritje e kolonëve izraelitë kundër palestinezëve.
Në përgjigje të veprimeve të Hamasit, ushtria izraelite nisi operacionin Shpata të Hekurta kundër objektivave të Hamasit në Rripin e Gazës. Përgjigja e Izraelit u shtri në ndërprerjen e furnizimit me ujë dhe energji elektrike në Gaza, duke përkeqësuar më tej kushtet e jetesës në këtë zonë, e cila ka qenë nën rrethim të rëndë që nga viti 2007.
