Kryeministri Albin Kurti ka thënë se dialogu i ndërmjetësuar nga Bashkimi Evropian do të dështojë në rast se Brukseli nuk bëhet më i ashpër ndaj Beogradit. Në një intervistë për “Financial Times”, Kurti citohet të ketë thënë se “perëndimi duhet t`i shuajë shpresat për rikthim të bisedimeve në rrugën e duhur, nëse nuk vepron më ashpër ndaj Serbisë”.
“Nëse nuk do të ketë dënime dhe sanksione ndaj Serbisë pas asaj që ka bërë, definitivisht nuk do të ketë dialog”, tha Kurti. “Ne do të përfundojmë në një menaxhim të dështuar të krizës dhe do të harrojmë fare çështjen e normalizimit”, shtoi kreu i ekzekutivit kosovar.
“Financial Times” rikujton se qeveria e Serbisë e ka mohuar çdo përfshirje në sulmin e 24 shtatorit, pavarësisht sasisë së armëve prej miliona eurosh të përdorura nga paraushtarakët dhe të prodhuara kryesisht në Serbi. Tutje kjo gazetë thekson se ‘ish-nënkryetari i Listës Serbe, Milan Radojiçiq, u arrestua dhe pranoi se ishte organizatori i operacionit, por tha se nuk kishte marrë urdhra nga qeveria në Beograd’.
Por, Kurti këmbëngul se grupi agresor “ka tentuar të nisë një konflikt të ri të armatosur”.
“Ata tentuan një luftë të re në Kosovë për të aneksuar pjesën veriore të vendit tonë”, tha Kurti, teksa ripërsëriti faktin se pas sulmit të 24 shtatorit “gjithçka ka ndryshuar”.
“Ne nuk mund të kthehemi në punën e zakonshme”, shtoi Kurti.
Ai i bëri thirrje të dërguarit të BE-së për Ballkanin Perëndimor, Miroslav Lajčák, të ndalojë së “konsideruari Serbinë si fuqi të natyrës, një lloj ariu irracional që duhet t’i hedhim qengja për ta qetësuar”. Kjo, sipas Kurtit, duhet të marrë fund për hir të normalizimit, paqes dhe sigurisë.
Kryeministri tutje në këtë intervistë e ka mirëpritur përforcimin e misionit paqeruajtës të KFOR-it me qindra trupa dhe pajisje të rënda, por theksoi se roli i tyre është vetëm në mbrojtjen dhe sigurinë e Kosovës.
“[Ata] nevojiten për sigurinë dhe mbrojtjen. . . Dhe kështu do të mbetet. Ne nuk kemi nevojë të bëjmë KFOR-in reagues të parë”, ka nënvizuar Kurti.
Kryeministri është në mesin e 40 liderëve që do të takohen në Bruksel në kuadër të Samitit të BE-së “Global Gateway”.
