Minatorët u thanë anëtarëve të komisionit parlamentar se po kalojnë nëpër vështirësi të mëdha shëndetësore dhe për ta “çdo minutë është i rëndësishëm”
Minatorët e Ndërmarrjes “Trepça” kanë hyrë në javën e dytë të grevës së tyre në minierën Trepça, rreth 700 metra nën sipërfaqen e tokës, derisa kanë bërë kërkesë që politika të bëhet bashkë në përmbushjen e kërkesave të tyre.
Në takimin e anëtarëve të Sindikatës së Punëtorëve të Trepçës me Komisionin për Ekonomi, Industri, Ndërmarrësi dhe Tregti të Kuvendit të Kosovës, ata thanë se minatorët po kalojnë nëpër vështirësi të mëdha shëndetësore dhe për ta “çdo minutë është i rëndësishëm”.
Kryetari i Sindikatës së Punëtorëve të Trepçës, Ibrahim Januzi, në fjalën e tij para anëtarëve të komisionit parlamentar, tha se kërkesat e minatorëve nuk kanë ndryshuar.
“Jeta e minatorëve dhe shëndeti i tyre është duke u rrezikuar. Prandaj, ne si minatorë vijmë nga sindikata mirëpo vijmë si përfaqësues të minatorëve dhe vijmë të negociojmë dhe dialogojmë të gjejmë një zgjidhje sepse atje situata është e rëndë, veçse kemi hyrë në ditën e tetë të grevës, kemi shumë persona që kanë kërkuar ndihmë mjekësore dhe janë në gjendje të rëndë shëndetësore”, tha Januzi.
Ai tha se çështja e minatorëve duhet të shkojë përtej politikës dhe duhet që humanizmi të vendoset në radhë të parë.
Minatori Sami Peci u bëri thirrje gjithë deputetëve dhe politikanëve nga të gjitha partitë kosovare që t’i lënë inatet sa i përket çështjes së minatorëve.
“Gjejeni një njeri që punon për minierën pa dallime politike, bëhuni së bashku, bëjeni një grup së bashku që doni t’ia shpëtoni jetën minatorëve. Sot është dita e tetë, ju kisha lutur, jam shumë i emocionuar, shpëtojani jetën minatorëve”, theksoi Peci.
Deputetja e Vetëvendosjes, Mimoza Kusari-Lila, tha se është e vërtetë që minatorët nuk përzihen në politikë, ngase ata kanë protestuar pothuajse gjatë kohës së çdo qeverie.
Ajo tha se humbjet ditore nga greva e minatorëve janë rreth 50 mijë euro, ndërsa tha se partia në pushtet nuk po e mbron kryeshefin e Trepçës, për të cilin minatorët po kërkojnë dorëheqje.
“Në gjithë këto rrethana të cilat janë rënduar shumë, a ja vlen të qëndrojë dikush poshtë në zgafelle (në grevë), derisa ne po e diskutojmë këtë çështje. Cila është arsyeshmëria dhe insistimi për heqjen e kryeshefit të Trepçës sepse ne nuk po e mbrojmë askënd, ngase Trepça është me humbje. Domethënë, një menaxher i suksesshëm e tregon organizatën me sukses”, theksoi Kusari-Lila.
Kërkesat e minatorëve që nga hyrja në grevë e tyre janë: Pagesat e pagave të ekzekutohen nga data 6 deri në datën 10 të çdo muaji pune; shkarkimi i menaxhmentit; sigurime shëndetësore dhe kushte më të mira të punës.
E themeluar në fillim të shekullit të 20-të, Trepça ishte ndër kompanitë më të mëdha në ish-Jugosllavi dhe ndër minierat më të mëdha të xehes së plumbit, zinkut dhe argjendit në Evropë, me mbi 20 mijë punëtorë. Në vitet e fundit, Trepça përballet me vështirësi ekonomike për shkak të mungesës së investimeve dhe uljes së prodhimit.
