AP
Gjatë gjashtë ditëve të fundit, forcat tokësore izraelite kanë hyrë thellë në Gazë në luftën e tyre kundër Hamasit, që u shpall si përgjigje ndaj sulmeve të përgjakshme të 7 tetorit mbi Izraelin, të kryer nga grupi militant islamik.
Një grup në rritje njësish, duke përfshirë forcat detare, ajrore dhe tokësore, i janë bashkuar përpjekjes. Ushtria izraelite tha se ka vrarë dhjetëra militantë dhe ka dëmtuar rrjetin strategjik të tuneleve të Hamasit. Ushtarët janë vendosur në shtëpitë e braktisura palestineze dhe kanë ngritur pozicionet e tyre.
Edhe pse operacioni po zgjerohet çdo ditë, ushtria izraelite refuzon që ta quajë pushtim.
Përdorimi i fjalëve të paqarta për këtë temë është më shumë se sa një çështje semantike. Duket se është një strategji e qëllimshme që synon të mbajë armikun jashtë balancës dhe të ruajë opsionet e tij teksa zhvillohet lufta e gjatë.
Në këtë tekst mund të mësoni më shumë se çfarë po bën Izraeli brenda Gazës.
A është pushtim?
Në kuptimin e mirë të fjalës një pushtim izraelit duket se është duke ndodhur.
Trupat tokësore kanë lëvizur brenda territorit të armikut dhe po operojnë vazhdimisht atje që nga e premtja e kaluar. Përderisa ushtria ka dhënë vetëm pak detaje specifike për operacionet e saj, ajo ka pranuar se tanket, artileria, këmbësoria, buldozerët dhe forcat speciale po marrin pjesë në të. Operacioni, sipas ushtrisë, po mbështetet nga sulmet ajrore.
Ushtria ka qenë e paqartë lidhur me vendndodhjen apo madhësinë e trupave që ka dërguar në Gazë. Por, në njoftimet e saj është sugjeruar se mijëra trupa u janë bashkuar përpjekjeve dhe numri i tyre duket se po rritet dita-ditës.
Palestinezët kanë përdorur gjuhë më të fortë, duke iu referuar bombardimeve izraelite me terma sikurse “masakër” dhe “gjenocid”. Ofensiva që po vazhdon deri më tani ka vrarë më shumë se 8.000 palestinezë, sipas Ministrisë së Shëndetësisë në Gazë që udhëhiqet nga Hamasi. Po ashtu, mijëra ndërtesa janë shkatërruar.
Si e quan ushtria?
Ushtria refuzon që të thotë se e ka pushtuar Gazën, duke iu referuar aktiviteteve të saj si “bastisje” dhe “operacione”.
Kjo bën që situata të jetë fluide, përderisa numri i trupave ndryshon dhe tash për tash, Izraeli po shmang që të sulmojë Hamasin me numër të madh ushtarësh dhe fuqi të madhe të zjarrit.
Këto taktika duket se synojnë të nxisin konfuzion te Hamasi dhe të lënë të hapura mundësi të reja për aksione të mëtejme. Megjithatë, Izraeli e ka bërë të qartë se do të mbajë prani brenda Gazës gjatë periudhës së ardhshme.
Gjatë fundjavës, ministri i Mbrojtjes, Yoav Gallant, dhe kryeministri Benjamin Netanyahu, thanë se operacioni ka hyrë në një fazë të re.
“Ne jemi në një fazë të re të luftës”, tha Gallant. “Toka në Gazë po dridhet. Operacioni do të vazhdojë deri në një urdhër të ri”.
Gjatë vizitës që u bëri trupave të martën, Gallant shtoi:
“Ne po dislokojmë forca në shkallë të madhe në thellësi të Gazës”.
Cili është plani?
Izraeli i ka vendosur vetes dy qëllime: kthimin e të gjitha pengjeve dhe shkatërrimin e Hamasit, grupit militant të armatosur që ka mijëra luftëtarë, raketa, bomba, raketa kundërtanke dhe mbështetje të rëndësishme të publikut.
Zëdhënësi i shefit të ushtrisë, admirali Daniel Hagari, vazhdimisht i referohet një plani metodik për të përmbushur këto qëllime, edhe pse ai nuk e quan këtë pushtim.
“Operacionet tona sulmuese do të vazhdojnë dhe do të intensifikohen sipas planit”, tha ai të martën, më 31 tetor.
Amir Avivi, gjeneral në pension dhe ish-zëvendëskomandant i divizionit të ushtrisë për Gazën, tha se terminologjia e paqartë që përdor ushtria është e qëllimshme. “Ata nuk duan që armiku të dijë se çfarë po bëjnë”, tha ai.
Por, Avivi, i cili tani udhëheq Forumin për Mbrojtje dhe Siguri të Izraelit – një grup i përbërë nga ish-komandantët ushtarakë – tha se është e qartë se çfarë duhet të bëhet që të përmbushen këto qëllime.
“Ka vetëm një mënyrë për që të bëhet kjo. Ata duhet ta pushtojnë të gjithë Rripin e Gazës dhe të kalojnë muaj e muaj të tërë duke çmontuar të gjitha aftësitë”, tha ai. “Çfarë ka lidhje se çfarë thotë ushtria”.
