Sot është dita e 38-të e luftës mes Izraelit dhe Hamasit. Spitalet Al Shifa dhe Quds në Gaza, të cilat u sulmuan nga forcat izraelite ditët e mëparshme, janë në kolaps të plotë. Nuk ka karburant, rrymë apo ujë dhe shërbimet shëndetësore të Gazës kanë njoftuar se disa foshnja të lindura para kohe kanë vdekur për shkak të pamundësisë për t’u ofruar kujdesin e duhur. Ndiqni lajmet më të fundit nga Gaza dhe Izraeli në blogun tonë të drejtpërdrejtë.
Më shumë se 800 të huaj kaluan nga Rripi i Gazës në Egjipt
Më shumë se 800 shtetas të huaj kanë kaluar nga Gaza në Egjipt përmes kalimit Rafah, tha një zyrtar egjiptian i kontrollit kufitar për CNN.
Avionët luftarakë izraelitë sulmuan disa objektiva të Hezbollahut në Libanin jugor, në përgjigje të sulmeve të kryera nga grupi militant libanez në Izraelin verior. “Aeroplanët luftarakë të Forcave Ajrore sulmuan disa objektiva të organizatës terroriste Hezbollah, duke përfshirë një kompleks ushtarak me një depo armësh dhe objekte të infrastrukturës ushtarake”, njoftoi mbrëmë Forca Ajrore izraelite në rrjetin X (Twitter).
OBSH: Spitali Al-Shifa në Gaza nuk funksionon më
Organizata Botërore e Shëndetësisë (OBSH) tha se Spitali Al-Shifa në qytetin e Gazës “nuk po funksionon më si spital” dhe se numri i vdekjeve në spital është “rritur ndjeshëm”.
Shefi i OBSH-së Tedros Adhanom Ghebreyesus tha se “të shtënat dhe granatimet e vazhdueshme” në zonën përreth spitalit kishin “përkeqësuar një situatë tashmë kritike”. Ai theksoi se bota nuk mund të heshtë ndërsa spitalet, të cilat duhet të jenë strehë të sigurta, kthehen në skena vdekjeje, shkatërrimi dhe dëshpërimi.
Shefi i kirurgjisë në spitalin Al-Shifa, Marwan Abu Saada, tha për BBC se foshnja e tretë e lindur para kohe vdiq për shkak të mungesës së energjisë elektrike.
