Gjykata e Apelit kundër korrupsionit në Shqipëri ka lënë në fuqi dy masat e ndalimit ndaj ish-kryeministrit, Sali Berisha.
Berisha kishte apeluar kundër masave “detyrim për t’u paraqitur” dhe “ndalim i daljes jashtë shtetit”, që Prokuroria kundër Korrupsionit (SPAK) i vendosi ndaj tij më 22 tetor.
Berisha po hetohet nga SPAK-u për përfshirje në “korrupsion pasiv të kryer në bashkëpunim” gjatë privatizimit të ish-kompleksit sportiv “Partizani”.
Genc Gjokutaj, avokati i Berishës, tha pas vendimit, se sërish do ta ankimojë atë.
“Do shfrytëzojmë të gjitha mjetet ligjore, do jetë një betejë e gjatë. Do të shkojmë në Gjykatën e Lartë”, u shpreh Gjokutaj. Ndërsa vetë Berisha sulmoi sërish SPAK-un, duke e quajtur “bandën më të rrezikshme në një institucion”.
Që prej caktimit të masave të sigurisë ndaj tij, Berisha ka sulmuar SPAK-un dhe Gjykatën kundër korrupsionit, që sipas tij po zbatojnë urdhra politikë. Ai nuk ka pranuar të paraqitet në SPAK sipas detyrimit, dy herë në muaj.
Ndërkaq Gjykata e Apelit, ka zbutur masën e sigurisë ndaj dhëndrit të tij, Jamarbër Malltezi, nga “arrest me burg” në “arrest shtëpie”.
Hetimet nga SPAK-u nisën pas një kallëzimi të dorëzuar në vitin 2020 nga Taulant Balla, tani ministër i Brendshëm. Në kallëzim theksohej se “Jamarbër Malltezi privatizoi kompleksin Partizani në mënyrë të paligjshme me një shumë rreth 100 mijë euro, ndërsa në këtë zonë tashmë janë ngritur disa pallate për banim. Kjo u arrit përmes vendimeve favorizuese të Qeverisë së drejtuar nga Sali Berisha”.
Kompleksi sportiv “Partizani”, me një sipërfaqe prej 26 mijë metrash katrorë, u privatizua në vitin 2008 dhe deri në atë kohë ishte pronë e Ministrisë së Mbrojtjes.
Rreth 22 mijë metra katrorë i përkisnin 64 trashëgimtarëve të pesë familjeve të ish-pronarëve, mes tyre edhe Jamarbër Malltezi, ndërsa 4 mijë metra katrorë të tjerë ishin pronë shtetërore. Në fund të procesit të kthimit të kësaj prone, Jamarbër Malltezi arriti të marrë 35 për qind të të gjithë pronës, duke përfshirë këtu edhe pjesën që ishte tokë shtetërore.
Sipas padisë së dorëzuar në SPAK, kjo është bërë përmes vendimeve të dyshimta të Qeverisë së Sali Berishës. Në atë sipërfaqe të përfituar, Jamarbër Malltezi së bashku me ortakun e tij Fatmir Bektashi, kanë ndërtuar disa kulla.
