Komisioni Qendror i Zgjedhjeve (KQZ) u ka kthyer përgjigje tre kryesuesve të kuvendeve komunale të Leposaviqit, Mitrovicës së Veriut dhe Zubin Potokut, se për të iniciuar shkarkimin e kryetarëve të komunave nëpërmjet peticionit, duhet 20 për qind e trupës elektorale në atë komune.
KQZ u ka kthyer përgjigjen grupeve nismëtare për shkarkimin e kryetarëve të komunave në veri, të cilat kishin dërguar në këtë institucion, pyetjen e njëjtë. Përgjigjet nga KQZ, siç tha zëdhënësi Valmir Elezi, i ka shkruar parashtruesve të pyetjeve dhe Ministrisë së Administrimit të Pushtetit Lokal.
“KQZ ka njoftuar kryesuesit e tri kuvendeve komunale, tri grupet nismëtare dhe MAPL-në edhe lidhur me numrin e përditësuar të votuesve të regjistruar në këto komuna, mbi bazën e të cilit përllogaritet numri minimal i nevojshëm i nënshkrimeve prej 20%”, ka deklaruar Elezi.
Numri i përgjithshëm i qytetarëve me të drejtë vote në komunën e Leposaviqit, sipas tij, është 13,441, e nga ky numër, 2,689 përbëjnë 20% të trupës elektorale në këtë komunë.
“Në komunën e Zubin Potokut, numri i qytetarëve me të drejtë vote është: 6,732. 20% i votuesve në këtë komunë është: 1,347. Në komunën e Mitrovicës së Veriut, numri i votuesve është: 18,199. Sipas përllogaritjeve, 3,640 votues përbëjnë 20% të trupës elektorale”, ka deklaruar Elezi.
