Ka nisur nga zbatimi programi i kredive të favorshme për shtëpi për familjet e reja të mjekëve, ushtarakëve dhe punonjësve të Policisë së Shtetit.
“Ky është vetëm fillimi i një rruge të re mbështetjeje afatgjatë për familjet e reja të atyre që i shërbejnë ditë-natë shtetit dhe qytetarëve të Republikës së Shqipërisë”.
Kryeministri theksoi se ky program i dhënies së kredive për shtëpi për të gjithë ata që kanë familje të reja me të gjitha interesat e marra përsipër nga shteti e bën plotësisht të mundur që ata të marrin një kredi dhe të blejnë një shtëpi.
“Sot interesat bankare janë mbi 6%. Janë shumë për dikë që ka vetëm një pagë. Nuk është e lehtë për bankat ta japin këtë kredi duke pasur parasysh perspektivën ndërsa duke pasur kredi pa asnjë interes ndryshon tërësisht norma”, u shpreh Rama.
Kryeministri siguroi se ky është program fitues për të gjithë ata që përfshihen.
“Ne kishim 300 kuota këtë vit. Është hera e parë. Procesi ka pasur probleme të natyrës burokratike, por është vetëm fillimi. Ne dhe aplikantët do të mësojmë. Vitin e ardhshëm do të kemi mundësinë ta zgjerojmë numrin dhe të gjitha këto kategori të bëhen me shtëpinë e tyre”, tha Rama.
Kryeministri theksoi se në mes të vitit të ardhshëm paga mestarë në sektorin publik në Shqipëri do të jetë 900 euro.
“Duhet të zgjeronim mundësitë në mënyrë që t’u jepnim të gjithëve më shumë mundësi dhe zgjerimi i mundësive vjen si rezultat i fuqizimit të ekonomisë dhe të financave, nuk vjen si rezultat i dëshirës. Ne na duhet që ta bëjmë këtë pa goditur themelet e ekonomisë, pa kthyer vendin në një piramidë të re dhe për këtë arsye ka qenë e vështirë, është dashur durim. Sot jemi në një fazë të re të ekonomisë së vendit, ku kemi mundësi më shumë, por duhet të vazhdojmë t’i zgjerojmë këto mundësi”, tha ai.
Kryeministri shprehu bindjen se kush investon për të ardhmen e vet në Shqipëri bën një investim fitues.
“Këtu më e mira është e gjitha përpara. Duhet të gjithë ta kuptojnë dhe ta besojnë këtë. Shqipëria, nuk ka asgjë tjetër veçse të shkojë më lart, më lart, më lart. Sepse Shqipëria ka dalë nga rrethi vicioz dhe një hap para, dy hapa mbrapa dhe mjafton të shikoni lekun. Shikojeni lekun sot, se të tjerat mund të merren me dyshim. Shikoni lekun. Lekun nuk e forcojnë as fjalimet e mia, as vendimet e qeverisë as planet e partisë, lekun e forcon ekonomia, vetvetiu”, tha ai.
