Nga data 1 janar me automjetet e tyre me targat RKS, shtetasit e Kosovës mund të kalojnë edhe nëpër Serbi, pa pasur nevojë që t`i ndërrojnë apo mbulojnë ato.
Dje ishte dita e parë e fillimit të zbatimit të vendimit të qeverisë së Serbisë, të marrëveshjes për targa, e arritur që në vitin 2011 me Kosovën në Bruksel. E autoritetet zyrtare në Prishtinë kanë thënë se për ta ndryshuar vendimin që targat e Serbisë të mbulohen kur hyjnë në Kosovë, do të presin edhe pak ditë.
Nga e hëna e 1 janarit, automjetet me targa të Republikës së Kosovës, RKS, nisën të hyjnë dhe lëvizin lirshëm në gjithë territorin e Serbisë, pa pasur nevojë të mbulohen simbolet shtetërore.
Zyrtarë që punojnë këtu në pikën kufitare në Merdar i kanë thënë RTK-së, prapa kamerës, se që nga ora 00:00 asnjë prej veturave me targa RKS nuk i është kërkuar nga autoritetet serbe vendosja e stikersave.
Ditë më parë, qeveria e Serbisë mori vendim për pranimin e targave, sipas marrëveshjes së Brukselit. Nisjen e zbatimit të vendimit për njohjen e automjeteve me targa RKS nga shteti serb e mirëpritën qytetarët.
“Më mirë që po i lëshojnë kështu si me RKS si me KS”, ka thënë një qytetare serbe.
Përderisa qytetarët lëvizën lirshëm me tabela RKS në Serbi, ata që erdhën me targa të këtij shteti, u desh që simbolet shtetërore t’i mbulonin me ngjitëse.
“Stikersi nuk nevojitet, duhet të kesh tabela që vlejnë andej dhe këndej”, thotë një qytetar tjetër.
Mbulimi i simboleve shtetërore në targat e Serbisë, nga ana e autoriteteve të Kosovës, do të vazhdojë edhe më tej, pasi kryeministri Kurti ka thënë se fillimisht do të pritet të shihet mënyra e zbatimit nga pala serbe.
Ndërkohë, lëvizjen e lirë me targa RKS në Serbi, e cilësoi si proces të rëndësishëm zëvendëskryeministri Besnik Bislimi.
“Nga sot, qytetarët tanë do të mund të lëvizin tashmë të padiskriminuar nga autoritetet serbe, me targat tona zyrtare RKS dhe pa vendosur ngjitëset në simbolet shtetërore në targat e veturave. Ky ishte pozicioni ynë që nga fillimi e kjo u realizua pas 2 vitesh tensione të panevojshme”, ka thënë ai.
Kosova dhe Serbia kishin arritur marrëveshje në vitin 2011 rreth çështjes së lëvizjes së lirë, por zbatimi ka pasur shumë pengesa. Kundër zbatimit të marrëveshjes pati barrikada e tensione në veri të vendit.
