Kulmi i objektit të ri të Komunës së Prishtinës është cilësuar se nuk është ndërtuar në bazë të standardeve të ndërtimit. Ekspertët të cilët kanë vlerësuar situatën me elementet e para, kanë thënë në konferencë për media se kulmi është ndërtuar me mbetje të materialeve ndërtuese.
Kryetari Përparim Rama ka thënë se komuna do të realizoj edhe vlerësime të tjera, por që fillimisht është dashur realizimi i një vlerësimi fillestar.
“Duhet ekspertizë urgjente e preliminare për të ditur se çka e ka shkaktuar këtë problem me kulmin e ndërtesës…Kam ftuar ekspertët e fushës, Visar Gecin e Gëzim Kastratin, që i kam parë si profesionistë që veprojnë jashtë Komunës për të analizuar e për të na dhënë një gjendje preliminare për rrëzimin e kulmit”, ka thënë Rama.
Tutje ai ka njoftuar publikun se viktima e cila u lëndua nga rënia e kulmit të objektit, Elza Ujkani ka rrezikshmëri të lartë shëndetësore.
“Për fat të mirë, gjendja është stabile, por ende është në rrezikshmëri të lartë. Jemi në kontakt çdo ditë me doktorët, e kam qenë në kontakt me familjen e sa”, ka thënë kryetari i Prishtinës.
Ndërkaq arkitekti Visar Geci, i cili është angazhuar si ekspert i jashtëm, ka dhënë detaje për hulumtimet e para të objektit.
“Kulmi ka rënë sepse struktura me të cilën është ndërtuar kulmi nuk është në bazë të standardit. Problemi ka qenë te binaket të cilat e kanë mbajtur kulmin, ato vetëm kanë pushuar në muri”, ka thënë Geci.
Tutje ai ka treguar se dyshohet që kulmi është ndërtuar nga mbetjet e materialeve të ndërtimit të objektit.
“Materiali që është përdorur nuk është i përpunuar, nuk është i lyer as i trajtuar. Po dyshojmë mos është mbetje e ndërtimtarisë sa ka qenë duke u ndërtuar komplet objekti, çka ka tepruar nga ajo e kanë përdorur për kulm”, ka thënë arkitekti. /Kosovatimes/
