Institucioni i Avokatit të Popullit ka paraqitur një draft marrëveshje për zgjidhjen e mundshme të përmbylljes së grevës dhe fillimit të vitit të ri shkollor. Avokati i Popullit, z. Naim Qelaj në kuadër të angazhimit si ndërmjetës mes palëve për zgjidhjen e situatës së krijuar për shkak të grevës nga sindikatat, ka pranuar letër nga Sindikata e Bashkuar e Arsimit, Shkencës dhe Kulturës e Kosovës (SBAShK) dhe tanimë të gjitha palët kanë paraqitur qëndrimet e tyre për daljen nga kjo situatë.
Me qëllim që të arrihet marrëveshja, Avokati i Popullit u është drejtuar palëve me një draft marrëveshje në të cilën ka propozuar një zgjidhje të mundshme, si zgjidhje e balancuar mbi bazën e qëndrimeve që palët kanë prezantuar, e njëkohësisht me kujdes janë paraqitur qëndrime që mund të sjellin konsensus.
Avokati i Popullit njofton se edhe më tej do të angazhohet për të përafruar palët në marrëveshje, duke ripërsëritur se është urgjente gjetja e një zgjidhjeje, që do të jetë në interes për të gjithë, e në veçanti për fëmijët.
Në pritje të përgjigjeve nga palët, Avokati i Popullit do të mbaj të informuar publikun. /Kosovatimes/
