Lidhja Demokratike e Kosovës (LDK) konsideron se Qeveria nuk ka asnjë të drejtë ligjore dhe morale që të ndërpresë pagat e mësuesve.
“Komunat janë punëdhënësit dhe këtë të drejtë e kanë komunat si njësi themelore të vetëqeverisjes në Kosovë. Qeveria thirret në Nenin 18 të Ligjit për Greva, duke injoruar në tërësi Nenin 13 i cili flet për mbrojtjen e të punësuarve gjatë grevës. Ky nen shprehimisht thotë se “Për organizuesit e grevës, pjesëmarrësve grevistë dhe ndaj të punësuarve të tjerë, të cilët mbështesin grevën, nuk mund të merren masa disiplinore apo materiale…”, thuhet në komunikatën për media të kësaj partie.
Sipas LDK-së, masat materiale në këtë raport kontraktual kanë të bëjnë pikërisht me pagën dhe kontributet. “Dukshëm ka kundërthënie në mes të Nenit 13 dhe 18, me ç’rast kjo kundërthënie nuk mund të interpretohet në dëm të palës që nuk e ka hartuar ligjin, e që janë grevistët”.
Për LDK-në, të mos paguhen pagat në kohë krize është e pamoralshme. Këto nuk janë para të qeverisë që të bëjë çfarë të dojë, sikurse t’ju hakmerret mësimdhënësve.
“Në kohën kur inflacioni vetëm ka shkuar në 20%, dhe qytetarët veç janë në krizë, qeveria lë pa paga 23,173 mësimdhënës. Është e papranueshme që sapo mbyllet një krizë, hapet një tjetër. Qeveria me këto masa po varfëron familjet dhe, nëse vazhdon me këtë ritëm, do të rrisë numrin e kërkuesve të asistencës sociale. Me inflacion ka zvogëlim të pagave në mandatin e kësaj qeverie, kurse me hakmarrjen e fundit ka ndërprerje të të hyrave për mbi 23 mijë familje”, thuhet në këtë komunikatën.
Qeveria e Kosovës, përmes zyrtarëve të shumtë e bëri të qartë se do të paguhen për muajin shtator, vetëm ata mësimdhënës që kanë punuar dhe nuk kanë qenë pjesë e grevës. Një veprim të tillë, ekzekutivi e arsyeton në ligj. Por me një vendim të tillë, nuk është se po pajtohen edhe disa deputetë të shumicës në Kuvendin e Kosovës.
Ministria e Arsimit, Shkencës, Teknologjisë dhe Inovacionit (MAShTI), njoftoi se orët e humbura gjatë grevës në arsim, do të zëvendësohen.
Ministrja e Arsimit, Arbërie Nagavci, tha se i ka propozuar Ministrisë së Financave, që të shqyrtojë mundësinë e pagesës në avans për mësimdhënësit që do të respektojnë këtë vendim. /Kosovatimes/
