Zyrtarët rusë duhet të kuptojnë pak më shumë qëndrimin e Serbisë, tha sot Milovan Drecun, kryetari i Komisionit Parlamentar për Kosovën dhe Metohinë, duke shtuar se Beogradi do të duhet të vendosë në një moment për të përdorur një lloj sanksioni kundër Rusisë.
“Nëse do të ndodhte kjo, askush nuk duhet të nxisë destabilitetin e brendshëm në Serbi, nuk duhet të jetë në interes të Perëndimit apo vendeve mike”, tha ai për Tanjug.
Drecun vlerësoi se situata për Serbinë është komplekse, se gjithçka është e ndërthurur.
“Nuk di ku të presësh, sido që të presësh do të ketë dëme”, tha ai.
Duket se Serbia nuk ka hapësirë për manovra, vlerësoi Drecun dhe shtoi se ka nevojë për mbështetjen e Rusisë në OKB për Kosovën dhe ne jemi të varur prej saj edhe për energji, përkujton ai.
“Ndoshta në një moment do ta lehtësojmë presionin për anëtarësimin e Kosovës në OKB, nëse fillojmë të ndjekim politikën e BE-së ndaj Rusisë”, tha ai.
Ai shtoi se është i befasuar që vetë Rusia nuk e njeh peshën e situatës në të cilën ndodhet Serbia, edhe pse zyrtarët e tyre thonë se po ushtrohet presion i fortë ndaj Serbisë.
“Rusët janë të zënë me problemet e tyre, por po na shtyjnë edhe në probleme të reja”, tha ai.
Duke folur për propozimin e Francës dhe Gjermanisë, Drecun tha se Serbia do të duhet të mendojë për këtë dhe se nuk mund të shtyhet vetëm anash.
Ai vlerësoi se çështja e Kosovës dhe deri në çfarë mase do ta ndjekim politikën e jashtme të BE-së, në radhë të parë ndaj Rusisë, janë të lidhura.
“Duhet të shohim se sa do të mund të durojmë dëmin që na është shkaktuar sepse nuk ndjekim politikën e BE-së ndaj Rusisë. Kur dëmi është më i madh se përfitimi, ne do të duhet të korrigjojmë politikën tonë nëse duam të luftojmë për interesat tona”, tha ai.
Drecun theksoi se për Serbinë nuk është e pranueshme asgjë që e kthen Kosovën në një shtet me kapacitet të plotë juridik ndërkombëtar, pra anëtarësimi në OKB.
“Nëse Kosova bëhet anëtare e OKB-së, nuk kthehet më në Serbi, kjo nuk është e pranueshme për ne”, ka theksuar ai. /Kosovatimes/
