Zëvendëskryeministrja e Kosovës që njëherësh është edhe ministre e Punëve të Jashtme, Donika Gërvalla sot do të marrë pjesë në takimin e Këshillit të Sigurimit të OKB-së, në Nju Jork.
Kryediplomatja Gërvalla do të përfaqësojë Kosovën në seancën ku do të shqyrtohet raporti periodik i Sekretarit të Përgjithshëm të OKB-së, Antonio Guterres për vendin tonë.
“Gjatë këtij takimi, ministrja Gërvalla do t’i paraqesë të arriturat e Republikës së Kosovës, sfidat me të cilat përballet, sukseset në fushën e ekonomisë dhe sundimit të ligjit, reformat në fusha të ndryshme si dhe perspektivën e vendit”, ka bërë të ditur zyra për media e MPJD-së.
Seanca e Këshillit të Sigurimit të OKB-së do të mbahet të martën, (sot), duke nisur nga ora 15:00, ndërsa sipas orës lokale në Kosovë nga ora 21:00.
