Serbia refuzon të vendosë sanksione ndaj Rusisë, por iu bashkua vendeve të tjera të Danubit në dënimin e përbashkët të “pushtimit të pajustifikuar ushtarak të Ukrainës”. Në qytetin sllovak të Košice, u mbajt forumi vjetor i 14 vendeve nëpër të cilat kalon lumi Danub ose që ndodhen përgjatë saj.
Ministrat e jashtëm të Austrisë, Bullgarisë, Kroacisë, Republikës Çeke, Gjermanisë, Hungarisë, Rumanisë, Sllovakisë, Sllovenisë, BeH, Serbisë, Malit të Zi, Moldavisë dhe Ukrainës miratuan një deklaratë të përbashkët me këtë rast. Në të, ata deklaruan se “në fillim të vitit 2022, bota u trondit nga pushtimi i paligjshëm, i paprovokuar ushtarak i Ukrainës sovrane dhe paqësore”.
“Ky agresion duhet të ndalet. Forcat ruse duhet të tërhiqen nga territori i njohur ndërkombëtarisht i Ukrainës (…)” , thuhet në deklaratën, e cila u miratua edhe nga Serbia.
Deklarata nuk është një tekst ligjërisht i detyrueshëm, por pasqyron udhëzime politike.
“Ne dënojmë fuqishëm pushtimin ushtarak të paprovokuar dhe të pajustifikuar të Rusisë në Ukrainë”, thuhet në deklaratë.
Situata e ndjeshme
Beogradi është në një situatë delikate sepse mban marrëdhënie të mira me Moskën dhe në të njëjtën kohë po negocion me Brukselin për anëtarësim në BE.
Në maj, Serbia, asokohe si pjesë e Forumit Adriatiko-Jonian (EUSAIR) të dhjetë vendeve, miratoi një deklaratë me përmbajtje të ngjashme, ku përmendej “agresioni i pajustifikuar i Rusisë” që filloi më 24 shkurt.
Përfaqësuesit e vendeve të Danubit u mblodhën të mërkurën dhe të enjten në kuadër të Strategjisë së Bashkimit Evropian për Rajonin e Danubit (EUSDR), një kuadër për dialog dhe bashkëpunim, nën kryesimin e Ukrainës. Ata diskutuan, ndër të tjera, për çështjet e sigurisë së furnizimit me energji dhe ushqim, veçanërisht drithë nga Ukraina.
Forumi u mbajt në Košice, një qytet 100 kilometra larg kufirit me Ukrainën.
Presidenti serb Aleksandar Vuçiç tha në një intervistë televizive të enjten në mbrëmje se Serbia nuk do të vendosë sanksione ndaj Rusisë derisa të ketë një kërcënim ekzistencial për Serbinë dhe qytetarët e saj.
Të premten, Ministrja e Jashtme gjermane Annalena Baerbock i bëri thirrje Serbisë të vendosë sanksione ndaj Rusisë. /Kosovatimes/
