Ka filluar protesta në shenjë mbështetjeje ndaj së moshuarës, e cila u dhunua fizikisht nga disa infermiere në shtëpinë e të moshuarve në Pejë. Protestuesit kanë vendosur postierë ku bëhet thirrje për dënim maksimal të infermieres Aurona Pelaj, si dhe dy kërkesa tjera
Pas sulmit nga infermieret në Shtëpinë e të Moshuarve në Pejë ndaj të moshuarës, ka filluar protesta në Gjakovë, pasi e moshuara në fjalë, është nga kjo komunë.
Protesta është thirrur nga organizata “Krimet e Luftës” në Gjakovë, e që në njoftimin zyrtar të tyre thuhet se protesta është duke u mbajtur në mbështetje të së moshuarës, e cila është nëna e dëshmorit, Taulant Nura.
Po ashtu, nga ana e tyre thuhet se protesta është duke u zhvilluar në mënyrë që pas këtij rasti, të mos ketë më tortura në shtëpitë e pleqve.
“Nana nuk më ka vetëm mua, Zhanetën, Milotin e Taulantin, por ju paska të gjithë ju”.
Kështu ka deklaruar e bija e së moshuarës e cila u keqtrajtua në shtëpinë e të moshuarve në qytetin e Pejës. Rrusta ka thënë se ky veprim është i padrejtë dhe persekutues.
“Nuk mundem në asnjë mënyrë me u pajtu me këtë formë ndëshkimi publik. Ky është persekutim. A mundet thirrja për drejtësi me tingëllu kështu? Asesi jo. Një qasje e tillë as nuk i ndihmon viktimës. Për më tepër krejt ngjarja është përcjellur me pamje të viktimës, aspak etike”, ka thënë ajo.
Pelaj në polici ka thënë se ka ushtruar dhunë ndaj të moshuarës pasi që ajo ishte e dhunshme, dhe se atë veprim e ka bërë për të treguar ‘dominancë’ ndaj saj vetëm sa për ta futur nën kontroll.
Ndërkaq, Gjykata e Pejës, mbrëmjen e së enjtes ka vendosur që tri infermiereve të cilat ishin të përfshira në keqtrajtimin e një gruaje 70 vjeçare, t’u caktohet masa e paraburgimit prej një muaji.
Në arsyetimin e prokurorisë thuhet se me datën tre nëntor të këtij viti është marrë aktvendim për fillimin e hetimeve kundër të pandehurve nga ora 13:00.
Protestuesit në Gjakovë kanë ngjitur në hapësirat publike postierë ku bëhet thirrje për dënim maksimal të Aurona Pelajt, e cila shkaktoi mijëra reagime dhe mllef nga veprimi i saj në vendin e punës, ku ka ushtruar dhunë fizike ndaj një të moshuare në qendrën e të moshuarve “Orenda” në Pejë.
Po ashtu, në postera bëhet thirrje që shtëpia e të moshuarve “Orenda” të mbyllet. Dhe nga ana e tyre kërkohet kontrolli rreptë i shtëpive private për të moshuarit.
Anëtarja e Partisë Socialdemokrate (PSD), Teutë Rrusta, ka publikuar fotografitë e infermieres Aurona Pelaj, të së cilës janë të vendosura në rrugët e qytetit.
