Për pranimin e planit evropian dje në Bruksel nga kryeministri i vendit, Albin Kurti, ka reaguar ish-kryeministri Isa Mustafa, i cili përmes një postimi ka thënë se pika e 7 e kësaj marrëveshje parasheh një vet-menaxhim për serbët në Kosovë.
Mustafa iu është drejtuar edhe presidentes Osmani si person që “vet-shitet si juriste” duke thënë se duhet të tregoj se a është kjo në përputhje me Kushtetutën e Kosovës, raporton Gazeta10.
“Marrëveshja bazë e pranuar nga Kryeministri Kurti në pikën 7 parasheh një formë të vet-menaxhimit për serbet në Kosovë, sipas përvojave evropiane. Le të tregojë Presidentja Osmani, që vet-shitet si juriste e fortë se a është kjo në harmoni me Kushtetutën; a parasheh Kushtetuta e Kosovës të drejta asimetrike për komunitetet, që serbet të kenë të drejta kolektive të vet-menaxhimit, kurse komunitetet e tjera jo?”, ka shkruar ai.
Tutje, ish-kryeministri ka thënë se Kurti ka pranuar kompetenca ekzekutive për serbët duke theksuar se sipas tij Asociacioni është diçka tjetër.
“Menaxhimi përfshin planifikimin, organizimin, personelin, drejtimin (udhëheqjen) dhe kontrollin. Pra kompetenca ekzekutive. Këto i pranoi kryeministri ynë. Asociacioni është diçka tjetër”, ka përfunduar ai. /Kosovatimes/
