Kryeministri i Kosovës, Albin Kurti, ka thënë se tashmë ka konfirmuar se tre policët e arrestuar “ishin zënë në pritë dhe kidnapuar nga forcat serbe” brenda territorit të Kosovës.
“Tani e kemi konfirmuar se tre policët e arrestuar në mënyrë ilegale ishin zënë në pritë dhe kidnapuar nga forcat serbe përderisa ishin në një pauzë të përbashkët dreke, nga një patrullë rutinore e kontrabandimit brenda territorit të Kosovës”, shkroi Kurti në Twitter.
Ai nuk ofroi detaje apo dëshmi se si ishte verifikuar vendndodhja e policëve në momentin e arrestimit.
Tutje, Kurti i bëri thirrje Serbisë “të ndalojë dezinformatat dhe t’i lëshojë zyrtarët tanë tani”.
Një ditë më parë, Kurti tha se shefi i Zyrës Ndërlidhëse të Kosovës në Beograd, Jetish Jashari, i kishte vizituar më 20 qershor tre policët e arrestuar ditë më parë nga autoritetet e Serbisë.
Në një konferencë për media me gazetarë, bashkë me ministren e Jashtme Donika Gërvalla, Kurti ka insistuar se policët janë rrëmbyer dhe se një veprim i tillë ka qenë hakmarrje ndaj Policisë së Kosovës, për shkak të, siç ka thënë, luftimit të krimit të organizuar.
Zyrtarët policorë të Kosovës janë arrestuar nga autoritetet serbe më 14 qershor.
Prishtina ka thënë se ata janë rrëmbyer në territorin e Kosovës, ndërsa Beogradi ka thënë se ata janë arrestuar në territorin serb.
Këto shkelje janë të dënueshme me deri në 12 vjet burgim.
Faktori ndërkombëtar ka bërë thirrje për lirimin e tyre, pa kushte.
