Këtë javë, gjeneralmajor Angelo Michele Ristuccia, komandant i misionit të KFOR-it, të udhëhequr nga NATO ishte në Bruksel, ku mbajti takime të nivelit të lartë në selinë e NATO-s dhe në Bashkimin Evropian.
Përmes një komunikate për medie, KFOR njofton se gjeneralmajori Rusticcia ka informuar Komitetin Ushtarak të NATO-s dhe Këshillin e Atlantikut të Veriut për zhvillimet e fundit në Kosovë dhe për prioritetet e KFOR-it.
“Bashkëpunimi NATO-BE u theksua gjithashtu si kyç për sigurinë e qëndrueshme në Kosovë dhe stabilitetin në të gjithë Ballkanin Perëndimor”, deklaroi gjeneralmajor Rusticcia.
Gjeneralmajor Ristuccia u takua gjithashtu me Sekretarin e Përgjithshëm të NATO-s, Jens Stoltenberg, Ndihmës-Sekretarin e Përgjithshëm të NATO-s për Operacionet, Thomas Goffus, Përfaqësuesin Special të BE-së për Dialogun Kosovë-Serbi dhe çështje të tjera rajonale të Ballkanit Perëndimor, Miroslav Lajçak.
Sekretari i Përgjithshëm, Jens Stoltenberg falënderoi gjeneralmajor Ristuccia për shërbimin e tij dhe angazhimin e palëkundur të Italisë, veçanërisht në këtë moment për stabilitetin në Ballkanin Perëndimor.
Komandanti i KFOR-it nënvizoi situatën e brishtë të sigurisë dhe rëndësinë e fokusimit të përpjekjeve kolektive në tejkalimin e mënyrës së menaxhimit të krizave. “Ishte një punë e vështirë, në baza ditore, për të siguruar që KFOR-i do të vazhdojë të zbatojë mandatin e tij të OKB-së në mënyrë të paanshme dhe në komplementaritet me përpjekjet e bëra nga Komuniteti Ndërkombëtar. U bënë shumë përpjekje dhe u përballën shumë sfida për shkak të situatës komplekse”, tha gjeneralmajor Ristuccia.
Tutje, ai përsëriti përkushtimin e palëkundur të KFOR-it për të vazhduar të luajë rolin e tij në krijimin e kushteve të nevojshme të sigurisë që dialogu i lehtësuar nga BE-ja ndërmjet Kosovës e Serbisë të ecë përpara; si dhe nevojën që të dyja palët të qetësojnë plotësisht situatën dhe të riangazhohen në dialogun e lehtësuar nga BE-ja në mënyrë konstruktive dhe me mirëbesim.
Në komunikatë, mes tjerash, bëhet e ditur angazhimi i KFOR-it nën komandën e gjeneralmajor Ristuccia. /Kosovatimes/
