Inspektorati Policor i Kosovës (IPK) ka suspenduar nga puna dy eprorë të policisë, pasi nuk i ofruan siguri të mjaftueshme një qytetari të arrestuar mbrëmë në Dragash. Po ashtu ka arrestuar edhe një polic i cili ishte përfshirë në një sulm fizik brenda stacionit policor.
Sipas njoftimit për media, IPK është informuar se brenda Stacionit Policor Dragash, deri sa policia e kishte sjellë një të dyshuar në stacion, policia dhe i dyshuari ishin sulmuar nga disa persona të tjerë.
Së bashku me qytetarët që kanë sulmuar të dyshuarin me të cilin kanë pasur konflikt ka qenë edhe një zyrtar policor.
“Ju njoftojmë se IPK menjëherë ka dalë në vendngjarje dhe ka intervistuar palët, është njoftuar prokurori kujdestar në Prizren dhe me urdhër të prokurorit pas intervistimit janë ndaluar katër të dyshuar, një pjesëtarë i PK-së, polic i ri dhe tre persona tjerë civil”, njofton IPK.
Lidhur me këtë rast, për menaxhim të dobët të rastit dhe dështim në ofrimin e sigurisë së të dyshuarit, me rekomandim të IPK-së janë suspenduar një toger policor (shefi i Hetimeve të Stacionit) dhe një rreshter policor (Shef i ndërrimit).
