Një gjeneral rus, një pjesëtar i lartë i Flotës Veriore, është vrarë në zonën luftarake në Ukrainë, njoftoi sot guvernatori i rajonit rus të Voronezh, ku gjenerali ishte në detyrë.
Gjeneral brigade Vladimir Zavadsky, zv/komandant i Korpusit të 14-të të Ushtrisë së Flotës Veriore, u vra në aksion në zonën e operacioneve speciale në Ukrainë, tha guvernatori Alexander Gusev në një mesazh Telegram, pa dhënë detaje për rrethanat e vdekjes së tij.
“Jam i bindur se emri i Vladimir Zavadskit, oficerit trim, gjeneralit të vërtetë dhe njeriut të denjë, do të mbetet përgjithmonë në analet e lavdisë së atdheut tonë”, shtoi Gusev, duke vlerësuar “besnikërinë” e gjeneralit.
Gjenerali, siç raportohet nga burime pranë ushtrisë, vdiq më 28 nëntor pasi shkeli një minë, prapa vijës së frontit.
Disa oficerë të lartë ushtarakë rusë janë vrarë që nga fillimi i ofensivës në Ukrainë në shkurt 2022 dhe vdekjet e tyre nuk janë konfirmuar gjithmonë nga burime zyrtare. Autoritetet ruse rrallë japin informacion për humbjen e tyre.
