Ish-guvernatori i Bankës Qendrore të Kosovës, Fehmi Mehmeti, e ka quajtur vitin 2023 si të vështirë për Kosovën për shkak të sulmit terrorist në shtator në Banjskë.
Mehmeti ka përmendur gjithashtu edhe problemet financiare dhe inflacionin që sipas tij, i ka vendosur nën presion bizneset dhe mirëqenien në familje.
“Stabiliteti politik është parakusht i zhvillimit ekonomik dhe i tërheqjes së investimeve të huaja, por edhe i diasporës”, ka shkruar Mehmeti në “Facebook”.
“Dëshiroj që në vitin 2024 të shoh në Republikën e Kosovës një dialog konstruktiv në mes të pozitës dhe opozitës, në mes të nivelit qendror dhe atij lokal, një avancim të dialogut publiko privat dhe një dialog social më aktiv në interes të qytetarëve dhe stabilitetit social në Republikën e Kosovës”, ka thënë ai.
Mehmeti kërkoi që të pranohet realiteti, se, vetëm një sektor privat i fuqishëm është garanci e qëndrueshmërisë ekonomiko sociale. Prandaj partneriteti dhe bashkërenditja e aktiviteteve ekonomike në mes të institucioneve dhe biznesit, sipas tij, është esenciale për Kosovën.
“Një diplomaci ekonomike, përcaktim i prioriteteve ekonomike për zëvendësimin e importit, funksionalizimin e një zone ekonomike nacionale, dhe koordinimi me shtetet mike siç janë ShBA-të dhe Europa, është më se e nevojshme, jo vetëm për promovim të mundësive për zhvillim ekonomik, por edhe për të përmirësuar imazhin e saj dhe për heqjen e masave të BE-së që iu vendosen Kosovës gjatë vitit 2023”, deklaroi ish-guvernatori i BQK-së. /Kosovatimes/
