Zëvendëskryeministri Besnik Bislimi, mori pjesë në ngjarjen e organizuar për Ditën Nacionale të Komunitetit Ashkali mbrëmjen e djeshme.
Në fjalën e tij, zëvendëskryeministri Bislimi drejtuar komunitetit tha se në këtë ditë kaq të veçantë, duhet të ndihen krenar për vlerat, arritjet aktuale dhe kontributin në Kosovën multietnik.
“Mirëqenia e komuniteteve pakicë, zbutja e diskriminimit, zhvillimi social dhe ekonomik, janë disa nga prioritetet e qeverisë sonë, andaj edhe do të mundohemi gjithmonë që së bashku të gjejmë zgjidhje për çdo sfidë, sepse vetëm së bashku mund t’ia dalim dhe ta përmirësojmë edhe më tej kualitetin e jetës së qytetarëve dhe të gjitha komuniteteve”, ka deklaruar Bislimi.
Ai ka premtuar se do të punojnë me përkushtim për të gjitha moshat, për një jetë sa më të mirë dhe për një shoqëri gjithëpërfshirëse e të barabartë.
Në ngjarje morën pjesë edhe Kryetari i Kuvendit, Glauk Konjufca, zëvendëskryeministrja e tretë, Emilija Rexhepi, ministrja e Industrisë, Ndërmarrësisë dhe Tregtisë, Rozeta Hajdari e deputetë të Kuvendit nga radhët e minoriteteve dhe shefi i zyrës së BE-së në Kosovë, Tomas Szunyog. /Kosovatimes/
