Forcës së Sigurisë së Kosovës (FSK) i janë shtuar flota e kamionëve ushtarakë multifunksional RheinMetall MAN HX2, 8X8, me prodhim gjerman.
Nga gjithsej 15 kamionë, 10 janë blerë me buxhet të shtetit, ndërkaq pesë janë donacion.
Kryeministri Albin Kurti dhe komandanti i FSK-së, gjenerallejtënant Bashkim Jashari, kanë qenë të pranishëm në hapësirat e institucionit, teksa ministri i Mbrojtjes, Ejup Maqedonci theksoi se këta kamionë janë ndër më modernët, multi-funksional, të dizajnuar për operacione logjistike dhe taktike.
“Karakteristikat e reja të këtij kamioni të pastër ushtarak janë shumë mbresëlënëse. Falë sistemeve të ndryshme të asistencës, HX2 u ofron ushtarëve dhe mjedisit civil siguri më të madhe në përdorimin e përditshëm të automjeteve dhe garanton dukshëm më shumë mbrojtje në kabinë”, tha ministri Maqedonci.
Tutje Maqedonci shtoi se menaxhimi i flotës në këta kamionë gjithashtu bëhet më i thjeshtë dhe më efikas, ndërsa konfigurimi i përgjithshëm mundëson transportimin e municioneve në terrene të vështira. /Kosovatimes/
