Kryeministri i Kosovës, Albin Kurti, sot në mbledhjen e Qeverisë, ka njoftuar se i ka thënë Agjencionit Kadastral të Kosovës që ta zbatojë vendimin e Gjykatës Kushtetuese lidhur me pronat rreth Manastirit të Deçanit.
Kryeministri Kurti foli për përpjekjet e qeverisë së Kosovës për anëtarësim të Kosovës në Këshillin e Evropës.
Mes tjerash ai përmendi edhe raportin i përpiluar nga Komisionin i KiE-së, në të cilin ka listuar disa nga kërkesat për zbatim nga ana e institucioneve të Kosovës, e mes tyre ishte edhe Manastiri i Deçanit, i cili do të mbetet një nga kushtet për anëtarësim të Kosovës në KiE.
Kurti më tej bëri të ditur se nga disa kushte të vëna për anëtarësim janë plotësuar e disa janë hequr, por njëra nga ato kushte, Manastiri i Deçanit ka mbetur si kusht i domosdoshëm.
“Qeverisë i është e bërë e qartë nga Komiteti i Asamblesë Parlamentare, si dhe nga shtetet e QUINT-it, që ne duhet të zgjedhim ndërmjet dy opsioneve: Të zbatojmë vendimin e GjK e të ecim tutje në anëtarësimi në KiE apo heqjen e Kosovës nga anëtarësimi”, vuri në dukje Kurti.
Ai tha se si qeveri nuk ka mjete legale për ta anuluar vendimin e Gjykatës Kushtetuese dhe që nuk do ta ndryshonte vendimin për këtë vendim asnjëherë, derisa shtoi se anëtarësimi i Kosovës në KiE do të ishte fitore historike.
Kurti ka thënë se këtë vendim e ka marrë për ta hequr si kusht për pranimin e Kosovës në Këshill të Evropës.
“Për të arritur një qëllim shumë më madhor që ia kemi borxh shtetit e që hap mundësi të papara më herët ne duhet të bëjmë një hap përpara me maturi e përgjegjësi si një vend i pavarur e sovran. Andaj, sot i kemi thënë Agjencionit Kadastral të Kosovës që ta zbatojë vendimin e Gjykatës Kushtetuese”, ka thënë Kurti në mbledhjen e Qeverisë.
“Andaj sot i kemi thënë Agjencionit Kadastral të Kosovës që ta zbatojë vendimin e Gjykatës Kushtetuese, kurse ministrja e Punëve të Jashtme dhe e Diasporës, Donika Gërvalla-Shvarc, i ka dërguar notë verbale njoftuese për këtë çështje Këshillit të Evropës”, deklaroi kryeministri Kurti.
Kurti: Të merren masa për agresionin e Serbisë kundër Kosovës
Në mbledhjen e Qeverisë së Kosovës, kryesuar nga kryeministri Albin Kurti, janë trajtuar një varg çështjesh, me fokus çështja e sigurisë në vend.
Ai, duke folur për sigurinë në vend, përmendi kriminelin e kërkuar edhe nga Interpoli, Milan Radoiçiq, për të cilin tha se ende është i lirë në Serbi e i mbështetur nga institucionet serbe.
Kryeministri Kurti, duke vënë theksin se ai ishte ndër më kryesorët në sulmin e 24 shtatorit të vitit të kaluar në Banjskë të Zveçanit, tha se si qeveri ka kërkuar të merren masa për agresionin e Serbisë ndaj Kosovës dhe ekstradimin e terroristëve që vranë rreshterin, heroin e Kosovës,Afrim Bunjakun .
“Që nga 24 shtatori ne kemi kërkuar që të merren masa për agresionin e Serbisë kundër Kosovës. Kemi kërkuar ekstradimin e terroristëve që vranë rreshterin, heroin e Kosovës,Afrim Bunjakun”, deklaroi kryeministri Kurti në mbledhjen e Qeverisë.
Ai tutje vuri në dukje se Serbia, megjithatë, nuk është ndëshkuar megjithë përfshirjen e saj në sulmin terrorist në Banjskë të Zveçanit.
Kryeministri Kurti, më tej tha se Kosova po dëshmon progresin më të madh demokratik në rajon.
Kurti më tej tha se qeveria e Kosovës nuk ka alternativë tjetër pos rreshtimit të palëkundur drejt aleancës transatlantike.
“Si qeveri e si popull, si orientim angazhohemi përherë për të shtrënguar e avancuar lidhjet e forta e të veçanta me SHBA-në, Gjermaninë, Mbretërinë e Bashkuar, Italinë, Francën”, tha mes tjerash kryeministri Kurti.
