Në varrezat e qytetit në Pejë iu dha lamtumira e fundit, 41 vjeçares Gjyljeta Ukella, nënës së tre fëmijëve e cila u vra nga bashkëshorti i saj mëngjesin e së martës në banesën e saj.
Në këtë dhimbje të madhe, familjarët e Gjyljetës edhe njjëherë bënë thirrje për drejtësi, me shpresën që raste të tilla të mos ndodhin asnjëherë.
“Për ne rasti është shumë i rëndë. Uroj që organet e drejtësisë sa më shpejt të zbardhin rastin dhe të kryejnë punën e tyre dhe uroj që asnjëherë të mos ndodhin këso raste në qytetin, e sidomos në shtetin e as në kombin tone, në Kosovë , Shqipëri e më gjërë. Ju faleminderit juve kaq është prej neve nuk dijmë kurgjë më tepër për rastin. Ju faleminderit shumë, ju falënderoj edhe ju media për punën dhe që po na ndihmoni, për krejt”, tha Shpat Ukella, vëlla i Gjyljetës.
Vrasjen e Gjyljetës e kanë dënuar rëndë edhe familjarët e bashkëshortit të saj.
“Nuk ka fjalë që mund t’a arsyetojë veprën e tij por do të doja që t’i shprehu ngushëllimet së pari nënës, vëllait, motrave të saj e t’ju themi se dhimbja është e njëjtë edhe për ne, ndajmë dhimbjen me ta, dhe Gjyljeta s’ka qenë për ne vetëm nusja e nipit por ka qenë edhe bijë e jona, të tillë e krijoi ajo realitetin te ne. La një boshëllek të madh edhe për ne. Shpreh ngushëllimet në emër të familjes sonë edhe pse vepra e tij ishte shumë shumë e rendë, por shimbja është e madhe, shumë e madhe”, tha Rona Haskaj, familjare e bashkëshortit të së ndjerës.
Kundër vrasjes së 41 vjeçares Gjyljeta Ukellës, sot në mesditë shoqëria civile dhe qytetarë të shumtë kanë protestuar në sheshin kryesor të Pejës.
“Mosndëshkimi i rasteve tragjike të dhunës është i papranueshëm, prandaj është koha e fundit që t’i themi stop kësaj dukurie të shëmtuar”, thanë ndër të tjera organizatorët e këtij marshi protestues.
