Shkruan: Endrit A. BINAKAJ
Vali na la dëshmi të gjallë ditarin e tij me ndodhi lufte, skena autentike, sakrificë e vetëmohim, jetë e dhënë për liri.
Valiant Ferizi, student i dalluar në Universitetin e Prishtinës, dega Gjuhë dhe letërsi gjermane, po përgatiste profilin e intelektualit të ardhshëm, sepse ëndrrat rinore janë projeksion për secilin qenie njerëzore, por ëndrrën për jetën, për planet e saj Valianti e kishte flijuar për idealin e lirisë së Kosovës. Ai po largohej nga shkallët e universitetit për t’iu bashkëngjitur Ushtrisë Çlirimtare të Kosovës në frontet e saja në Dukagjin, për të mbetur përherë pjesë e historisë sonë të lavdishme. Megjithatë, studenti edhe në frontet e luftës nuk e kishte harruar lapsin, armën më të fortë të tij, duke pasqyruar çdo moment të betejave që ishin zhvilluar gjatë luftës së viteve 1998-1999.
Gjersa lexoja shkrimet në origjinal të ushtarit të lirisë, mendoja më vete, shikoja fotografinë e tij, të buzëqeshur, zhvendosesha shpeshherë në pozicionin e tij, ishin të pashpjegueshme ndjenjat që më kaplonin, ndjenja dhimbjeje, krenarie, sakrifice dhe vetëmohimi. Të gjitha këto, me admirim të pashoq, i thonë për dëshmorin e kombit edhe shokët e studimeve dhe të luftës, madje edhe njerëz që e kishin takuar kalimthi. Vetitë e personalitetit të Valiantit, pashmangshëm ishin të brumosura nga familja Ferizi, babai Njazi Ferizi, profesor i respektuar dhe xhaxhai Shaqë Avdi Ferizi, ikona e këngëve patriotike, ishin frymëzim dhe pasqyrë e karakterit të pathyeshëm të heroit të kombit, Valiant Ferizit.
Valiant Ferizi, la gjurmë të thella dhe shumë të prekshme si testament për kohën, ditarin e tij që më aq fanatizëm e ruajti në kushte të vështira në betejat e Dukagjinit. Madje, sikur e parandiente vdekjen e vet, pak ditë para së të binte dëshmor në fushën e nderit, më 24 maj 1999, e kishte lënë në Shtabin e UÇK-së, si amanet për ne të gjallët e përkohshëm, sepse liria e Kosovës kishte çmimin e shtrenjtë dhe i vinte erë gjaku të njomë. Dëshmori Valiant Ferizi flet me secilin nga ne, sikur na bën thirrje: “Unë jam atje lart, triumfues dhe i gëzuar se era e lirisë ka pushtuar çdo skaj të mëmëdheut”.
LAVDI DËSHMORIT TË KOMBIT VALIANT (NJAZI) FERIZI!
