Asociacioni i Gazetarëve të Kosovës ka reaguar ndaj Komisionit për Medie të Kuvendit të Kosovës lidhur me Projektligjin për Komisionin e Pavarur për Medie (KPM), duke iu referuar opinionit ligjor, për këtë çështje, të Këshillit të Evropës.
Përmes një njoftimi për medie, AGK ka bërë të ditur opinionin ligjor për KPM-në të Këshilli i Evropës, duke konfirmuar disa aspekte të projektligjit, të cilat sipas KiE-së, nuk janë në përputhje me standardet më të mira evropiane.
Aspektet kryesore të kritikuara nga Këshilli i Evropës, sikundër vë në dukje AGK, janë: ndryshimi i projektligjit për KPM-në pa koncept-dokument në kundërshtim me rregulloren e qeverisë, mënyrën e definimit dhe rregullimit të mediave ‘online’, ndryshimet rrënjësore në përbërjen, emërimin, mandatin dhe shkarkimin e anëtarëve të KPM-së, largimin e kufizimit ligjor që në të kaluarën ia pamundësonte partive politike dhe bashkësive fetare hapjen e televizioneve dhe radiove dhe mungesën e transparencës gjatë nismës legjislative.
“Ne shprehim keqardhjen tonë për qortimin që i është bërë shtetit të Kosovës nga ana e Këshillit të Evropës, institucion ky në të cilin Kosova synon të anëtarësohet. Qortimi është rezultat i tendencës së qeverisë dhe shumicës parlamentare për të kontrolluar mediat dhe rregullatorin e mediave (KPM) përmes këtij projektligji dhe refuzimit të qëllimshëm të Zyrës së Kryeministrit për të përfshirë industrinë e medies dhe shoqërinë civile në fazat e hershme të nismës legjislative”, thuhet në njoftim.
Tutje, AGK përmend mediat në vendet fqinje, ku si praktikë e mirë përmendet Grupi Punues në Mal të Zi, i përbërë nga 25 përfaqësues të cilët kishin punuar në ndryshimet e ligjeve për media për 2 vjet, duke zhvilluar më shumë se 25 takime.
“Mirëpo, meqenëse është vonë për të krijuar një grup punues, opinioni ligjor rekomandon që definicioni i shërbimeve audio-vizuele të kthehet siç kanë qenë fillimisht me draft-ligjin e parë, pa mediat ‘online’ që publikojnë video, dhe ndryshimi i këtij aspekti të bëhet në një fazë më të vonshme”, nënvizon AGK.
Duke ia rikujtuar Qeverisë dhe Parlamentit të Kosovës shkakun e rënies në indeksin e Reporterëve Pa Kufij, si dhe duke përshëndetur gatishmërinë për bashkëpunim të Këshillit të Evropës, Bashkimit Evropian dhe OSBE-së që të ofrojë ekspertizë ndërkombëtare, AGK shpreson në vullnetin politik për përmirësimin e projektligjit deri në atë masë sa të jetë plotësisht në përputhje me standardet me të mira evropiane. /Kosovatimes/
