Mbjellja e 1500 drunjve dekorativë do t’i kushtojnë komunës së Fushë Kosovës hiç më pak se rreth 700 mijë euro. Por, për këtë projekt opozita po e kritikon komunën se nuk po e rregullon sheshin siç kishte premtuar. Në komunë thonë se mbjellja e drunjve është kërkesë e qytetarëve.
Mbjellja e drunjve në lagjen “Dardania” në Komunën e Fushë Kosovë ka ngjallur reagime të opozitës. Sipas tyre, aty nuk po rregullohet kurrfarë sheshi, por po mbillen drunj sa për t’i shpenzuar qindra e mijëra euro.
“Problemi qëndron në faktin që janë duke u mbjell jo në kohën e duhur dhe pjesa tjetër. Na kem votuar një plan të mobilitetit, ku parasheh një ristrukturim të plotë të tij dhe me gjasë vendosja e drunjve, në mënyrën dhe vendin ku po vendosen jep me kuptu që është vetëm sa për tu kryar kjo pjesë”, tha Mirsad Qyqalla, asamblist i PDK-së.
Kurse, Durim Hajra, asamblist i Vetëvendosjes, tha se disa prej problemeve janë që gropa të cilat hapën për me u mbjell këta drunj në raste janë mbi gypin e kanalizimit, rrjetit elektrik ose operatorëve kabllorë.
“E dyta ka të bëjë me sigurinë, pasi projekti është duke u bërë shkel e shko në disa pjesë e që po rrezikohen edhe fëmijët e kanë mbetur gropa të hapura më shumë se një javë”, tha ai
Në titullin e kontratës që e ka siguruara RTK, shkruan se do të bëhet rregullimi i sheshit në lagjen Dardania, në Fushë Kosovë, por në përshkrimin e realizimit të punimeve, specifikohet mbjellja e 1500 drunjve dekorativë.
Drejtori i shërbimeve publike në Fushë Kosovë, Ardit Sekiraça, e sqaron se projekti që pritet të realizohet deri në fund të vitit.
“Projekt ka ardhur si kërkesë e qytetarëve, ku do të mbillen 1500 drunj, derisa çmimin rreth 700 mijë eurove nuk e përcakton komuna”, tha ajo.
Sipas Sekiraçes, këta drunj po mbillen me plan dhe nuk mund të sjellin problem në të ardhmen.
