Albulenë Kastrati, ligjëruese universitare në Amerikë, ka folur për sfidat e ekonomisë në vendin tonë si dhe për investimet e huaja në Kosovë. Ajo në ‘InfoPlus’, në RTK, ka thënë se vendi ynë, viteve të fundit, ka përmirësuar dukshëm klimën biznesore, si në aspektin e zbatimit të kontratave, mbrojtjes së investitorëve të vegjël, pagesës së tatimeve, etj.
“Kosova është shndërruar në një vend shumë atraktivë për hapjen e bizneseve të huaja”, tha Kastrati, derisa shprehu keqardhjen për mosnjohjen e lehtësimeve të të bërit biznes nga ana e afaristëve të huaj dhe të mërgatës kosovare.
Ajo shtoi se për hapjen e një biznesi janë lehtësuar dukshëm procedurat administrative, sepse, nënvizoi ajo, “këtu është vendi për të bërë para”.
Siguria politike në vend, sipas Kastratit, ndikon shumë në investimet e huaja, sepse, sqaroi ajo, ata dëshirojnë që investimet e tyre të jenë të sigurta.
Kastrati, gjithashtu, u shpreh kritike edhe ndaj institucioneve vendore që nuk kanë bërë sa duhet në lobimin për investime të huaja në Kosovë.
