Hajrush Krasniqi ka 6 fëmijë nga 1 deri në 11 vjeç. Për secilin prej tyre thotë se merr nga 10 euro. Por me vendimin e fundit të Qeverisë, shtesat e tyre do të rriten.
Këtë vendim ai e ka mirëpritur sepse thotë se shtesat aktuale të tyre janë të pamjaftueshme.
“Unë i kam tre djem dhe tri vajza dhe nga 10 euro i marrim shtesat. Është vështirë pak nga 10 euro, tash pasi i kanë rrit ndoshta bëjmë diçka”, ka thënë Krasniqi.
Kurse Driton Nimani ka dy fëmijë. Sipas tij, kostoja e jetesës, papunësia, kërkesat dhe shpenzimet e fëmijëve mbesin të larta.
“Unë i kam dy fëmijë dhe çdo rritje është e mirëseardhur edhe pse simbolike. E presim mirë sepse kushtet edhe çmimet e fundit kanë bërë që shpenzimet të jenë të larta dhe menzi ia dalim disi. Presim nga qeveria që të këtë rritje akoma të tjera”, ka thënë Nimani.
Me skemën e re, për fëmijën e parë dhe të dytë, shtesat e reja do të jenë nga 20 euro në muaj secili, ndërsa për ata që kanë tre fëmijë e më shumë, shtesat do të jenë nga 30 euro në muaj.
