Ministria e Punëve të Jashtme dhe Diasporës organizoi festë në kuadër të 25-vjetorit të çlirimit të Kosovës ”Faleminderit mërgatë”.
Kjo festë synon të shprehë mirënjohjen e popullit dhe institucioneve të Kosovës ndaj komunitetit shqiptar në diasporë për kontributin e tyre të jashtëzakonshëm në çlirimin dhe zhvillimin e vendit gjatë 25 viteve të fundit.
E gjithë kjo duke i dhënë një mesazh falënderimi mërgatës, e cila ndër vite dha kontribut në çlirimin dhe ndërtimin e vendit.
Këto aktivitete që bënë bashkë gjithë mërgatën u mirëpritën nga bashkatdhetarët.
Ministrja Donika Gërvalla tha se pikërisht në këtë 25-vjetor të çlirimit të Kosovës është momenti t`i thuhet në mënyrë institucionale faleminderit mërgatës. Ajo tha se shpreson se kjo ditë të jetë tradicionale dhe të ketë aktivitete të posaçme.
Qytetarët patën rastin të jenë pjesë e këndeve të shumta të vendosura në sheshin “Skënderbeu”, përmes të cilave u promovuan produkte vendore, turizmi, kultura e teknologjia.
Gjithashtu në këndet e informimit qytetarët patën mundësi për t`u njoftuar për shërbimet konsullore që ofrohen nga Ministria e Jashtme dhe misionet diplomatike nëpër botë, vizat, si dhe uljen e tarifave për shërbimet konsullore, vendim ky që ka hyrë në fuqi pak ditë më parë.
Aktivitetet përmbyllen me një koncert ku performuan artistë të njohur nga Kosova e Shqipëria.
