Trepça nuk po gjen assesi qetësi. Sërish minatorët e kësaj ndërmarrjeje po përballen me mungesë të pagave. Ata nuk janë paguar që 2 muaj, andaj puna ka disa javë që është ndalur në minierën e Trepçës në Stantërg. Bordi i Trepçës nga ana e tij thekson se po mundohen që të gjejnë zgjidhje.
Që 21 ditë, puna është ndalur në minierën e ‘Trepçës’ në Stan Tërg. Gjiganti i dikurshëm metalurgjik që dy muaj nuk ka arritur t’i paguaj minatorët.
“Krejt kemi familje, kemi kredi. Për që s’na këqyr Qeveria qishtu si kemi shti mendtë. Qitu në mëngjes kur kanë ardhë minatorët, s’kanë pasë pare për bukë”, tha për RTK, Sadik Aliu, minator.
Kryesindikalisti i minatorëve nuk përjashton protestën si hap të radhës për të shprehur pakënaqësinë, nëse nuk arrihet një zgjidhje.
“Për shkak detyrimeve financiare ndaj instituvioneve financiare, për shkak detyrimeve e termineve mjekësore që i kanë, ndaj qirave e shumë të tjera, minatorët janë ardhë në një gjendje shumë të rëndë sa që ka prej tyre që po paraqesin shqetësime, disa prej tyre po thonë se kanë mungesë edhe të ushqimit”, tha Ibrahim Jonuzi, kryetar i sindikatës së minatorëve.
Nga menaxhmenti i ndërmarrjes kanë deklaruar se po punojnë për të tejkaluar vështirësitë financiare në mënyrë që punëtorët të marrin pagat dhe minatorët t’i kthehen punës në minierë.
“Bordi Mbikëqyrës i cili ka marrë detyrën këtë muaj, po punon ngushtë me menaxhmentin për të zbatuar një plan veprimi emergjent dhe po zhvillon komunikim të vazhdueshëm me aksionarët-Qeverinë e Republikës së Kosovës dhe punëtorët, për të mundësuar një zgjidhje të qëndrueshme dhe afatgjate.
Puna në minierë ishte ndalur edhe në tetor të vitit të kaluar. Pas 11 ditësh grevë, minatorët kishin dalë nga nëntoka.
Ekzekutimi i pagave me kohë ishte një ndër pikat e marrëveshjes që ishte arritur atëkohë në mënyrë që minatorët të dilnin nga greva, por puna u ndërpre sërish për shkak se kjo marrëveshje nuk po zbatohet.
