Këshilli i Sigurimit i Kombeve të Bashkuara ka thirrur një mbledhje urgjente për të diskutuar situatën e fundit në Lindjen e Mesme pas vrasjes së udhëheqësit politik të Hamasit, Ismail Haniyeh. Ngjarja ka tensionuar më tej rajonin, duke shkaktuar reagime të ashpra nga fuqitë botërore.
Ambasadori amerikan në Këshillin e Sigurimit të OKB-së, Robert Wood, bëri thirrje për shqyrtimin e masave shtesë për të mbajtur Iranin përgjegjës për veprimet e grupeve të armatosura si Hezbollahu dhe Hamasi. Wood theksoi se Hezbollahu është përgjegjës për sulmin me raketa në Golan, ku humbën jetën 12 të rinj.
Nga ana tjetër, përfaqësuesja e Britanisë së Madhe, Barbara Woodward, vuri theksin në nevojën për një zgjidhje diplomatike, duke argumentuar se përshkallëzimi i dhunës nuk i shërben askujt. Ajo kërkoi vetëpërmbajtje të menjëhershme dhe paralajmëroi për ndikimin destabilizues të Iranit në rajon.
Ambasadori kinez në Këshillin e Sigurimit, Fu Cong, e dënoi fuqishëm vrasjen, duke theksuar se mjetet ushtarake nuk do të sjellin zgjidhje, por vetëm një krizë më të madhe.
Kjo mbledhje e jashtëzakonshme reflekton shqetësimet ndërkombëtare mbi përshkallëzimin e dhunës dhe nevojën për një përgjigje të koordinuar për të parandaluar një konflikt të mëtejshëm në rajon. /Kosovatimes/
