Mbrëmë, në Letnicë të Vitisë, u mblodhën mijëra qytetarë nga e gjithë Kosova dhe jashtë saj për të kremtuar Vigjilien e Festës së të Ngriturit e Zojës në Qiell. Ngjarja, që është një nga momentet më të rëndësishme të kalendarit katolik, bashkoi pelegrinë nga të gjitha anët, duke dëshmuar edhe njëherë vlerat e bashkëjetesës dhe tolerancës fetare në vend.
Në këtë kremtim të shenjtë, uroi besimtarët katolikë dhe pelegrinët kryetari i LDK-së, Lumir Abdixhiku, i shoqëruar nga Sokol Haliti, Anton Çuni dhe Visar Berisha.
Gjatë vizitës së tij, ai shprehu urimet më të mira për famullitarin Don Marjanin dhe për të gjithë ata që ishin mbledhur për të festuar.
“Letnica, në këtë natë të shenjtë, u shfaq si një simbol i fuqishëm i unitetit të popullit të Kosovës, duke dëshmuar se bashkëjetesa ndërfetare dhe ndërkulturore është një vlerë e çmuar dhe një pasuri kombëtare. Ai theksoi se toleranca është një vlerë ndërshekullore e popullit tonë dhe se kultivimi i saj është një detyrim jo vetëm human por edhe patriotik”, tha Abdixhiku.
Në përfundim, ai uroi të gjithë besimtarët për një festë të bekuar dhe të gjithë njerëzit vullnetmirë për një festim të këndshëm, duke falënderuar Ipeshkvin Dodë Gjergji për fjalët e ngrohta dhe mikpritjen e tij. /Kosovatimes/
