Shoqata “Miqtë e Amerikës” ka festuar 78-vjetorin e lindjes së ish-presidentit amerikan, Bill Clinton. Kryetari kësaj shoqate, Agim Rexhepi, tha se në këtë mënyrë shprehin falënderimet për dhënien e urdhrit NATO-s për çlirimin e Kosovës.
“Kjo është me tregu që populli i Kosovës është falënderues për veprimet që i kanë bërë ShBA-ja me aletet për Kosovën dhe Shqipërinë. Presidenti Clinton ishte ai që dha urdhrin për intervenimin e NATO-s në Kosovë dhe shumë presidentë të tjerë”, ka theksuar Rexhepi.
Ai ka theksuar me respektimin e institucionit të Presidencës së Amerikës, respektohet edhe shteti i Kosovës.
E pranishme ishte edhe këngëtarja Shkurte Fejza, e cila e quajti ish-presidentin Clinton si mik të madh të shqiptarëve.
Bill Clinton (William Jefferson Clinton) lindi më 19 gusht të vitit 1946 në Hope, Arkansas, SHBA. Bill Clintoni është një politikan amerikan i cili shërbeu si President i 42-të i Shteteve të Bashkuara nga viti 1993 deri në vitin 2001.
Kujtojmë se, Bill Clintoni gjatë kohës së mandatit të tij si president i shtetit më të fortë në botë ndikoi në miratimin dhe realizimin e vendimeve të OKB-s për ndërhyrjen e NATO-s në luftën e Kosovës në vitin 1999.
