Sot, në Prishtinë, Kryetari i Komunës së Prishtinës, Përparim Rama, dhe Kryetari i Lidhjes së Bizneseve të Kosovës, Besart Dreshaj, nënshkruan një Memorandum Mirëkuptimi, duke shënuar një hap të rëndësishëm drejt forcimit të bashkëpunimit institucional mes dy institucioneve.
“Qëllimi i këtij memorandumi është krijimi i një platforme të vazhdueshme dhe konkrete bashkëpunimi me fokus në promovimin e prodhimeve vendore, lehtësimin e procedurave administrative për bizneset, dhe përmirësimin e mjedisit të përgjithshëm biznesor në Prishtinë”, thuhet në komunikatë.
Tutje thuhet se, memorandumi synon të promovojë prodhimet dhe shërbimet vendore, të lehtësojë procedurat administrative për bizneset dhe të avokojë për nisma ligjore që adresojnë sfidat e komunitetit të biznesit.
“Kryetari Rama dhe Kryetari Dreshaj theksuan rëndësinë e bashkëpunimit të përhershëm për zhvillimin ekonomik të kryeqytetit, në të mirë të qytetarëve dhe komunitetit të biznesit”, thekson komunikata.
Ky Memorandum shënon një fillim të ri në angazhimet e përbashkëta për përmirësimin e mjedisit ekonomik dhe përkrahjen e bizneseve në Prishtinë. /Kosovatimes/
