Duke filluar nga dita e sotme, 1 shtator 2024, të gjitha subjektet politike (partitë politike, koalicionet, nismat qytetare dhe kandidatët e pavarur) që duan të marrin pjesë në zgjedhjet për Kuvendin e Kosovës, duhet të dorëzojnë në Komisionin Qendror të Zgjedhjeve kërkesën e tyre për certifikim dhe listën e kandidatëve për deputetë.
Një gjë e tillë është bërë e ditur për RTKLive nga zëdhënësi i KQZ-së, Valmir Elezi.
“Duke filluar nga 1 shtatori fillon periudha për aplikim të subjekteve politike që duan të certifikohen për pjesëmarrje në zgjedhjet për Kuvendin e Kosovës, të cilat do të mbahen më 9 shkurt 2025”, ka thënë Elezi.
Gjithashtu, ai ka treguar se gjatë kësaj kohe subjektet politike duhet të dorëzojnë edhe listën e tyre me kandidatët për deputetë.
“Gjatë kësaj kohe, pra 1 shtator – 11 dhjetor 2024, subjektet politike (partitë politike, koalicionet, nismat qytetare dhe kandidatët e pavarur) duhet të dorëzojnë në Komisionin Qendror të Zgjedhjeve edhe listën e tyre me kandidatët për deputetë”, shtoi Elezi.
