Kryetarja e Preshevës, Ardita Sinani, tha se është momenti që të bashkohemi dhe të mobilizohemi për marshimin që do të mbahet në Preshevë.
“Protesta jonë për identitet dhe dinjitet vazhdon!. Është momenti që të bashkohemi dhe të mobilizohemi për marshimin që do të mbahet në Preshevë. Në gusht ishim bashkë në Bujanoc, tani, në shtator, na takon të dëshmojmë forcën tonë në Preshevë, si një trup i vetëm, për të treguar se problemet tona nuk mund të anashkalohen më. Kundër diskriminimit dhe padrejtësive që përjetojmë në Luginën e Preshevës, marshojmë për barazi dhe drejtësi. Kërkojmë atë që na takon me të drejtë – as më shumë, as më pak, por gjithmonë atë që meritojmë!”, ka shkruar ajo në “Facebook”.
Ajo tha se marshojmë për ndalimin e pasivizimit të adresave, për njohjen e diplomave tona, për krijimin e vendeve të punës dhe për institucione që janë të hapura për të gjithë.
“Zbatimi i marrëveshjeve të nënshkruara dhe respektimi i detyrimeve të shtetit ndaj shqiptarëve të Luginës janë thelbësore për të ardhmen tonë. Kërkojmë një Preshevë me Gjykatë, me përfaqësim të drejtë në institucione, ashtu siç na takon!. Ky marshim është për të gjithë ne, për dinjitetin dhe identitetin tonë! Ju ftoj të bashkoheni dhe të marshojmë së bashku – sepse vetëm të bashkuar, jemi më të fortë”, tha ajo.
