Katër partitë më të mëdha rivale politike, VV, LDK, PDK dhe AAK janë nisur në fushatë me ofensivë për ta grabitur kush më shumë votën e diasporës për zgjedhjet e 9 shkurtit 2025. Njohësit e zhvillimeve të deritashme politike në vend, konsiderojnë se ky orientim drejtë diasporës, është një tregues i cili flet mjaftueshëm se besimi i partive politike në vend është lëkundur te të gjitha pa dallim, për shkak të zotimeve dhe premtimeve të pa realizuara gjatë mandateve të kaluara. Prandaj tashmë ka mbetur vetëm edhe diaspora që të sprovohet dhe shfrytëzohet për ta plotësuar boshllëkun e rrezikshëm elektoral të krijuar në vend, nga zhgënjimi i madh i qytetarëve më gjendjen e krijuar ndër vite. Pra, lufta për votën e diasporës do të jetë po aq e ashpër sa ajo për votën e qytetarëve rezident në Kosovë, pasi që tashmë janë krijuar mundësi dhe lehtësi që diaspora të voton edhe jashtë, pa u detyruar që votuesit të vijnë dhe votojnë në Kosovë siç ka ndodhur mandatet e kaluara, ose të votojnë me postë dhe pastaj votat e tyre ta humbin sigurinë dhe peshën e ndikimit në rezultatin final dhe vendimtar.
Analisti Xhevat Meha, konsideron se mërgata është një storje e dhimbshme që po abuzohet nga politika në vend, sepse padrejtësisht ata qytetar janë detyruar të largohen nga vendi, njësoj sikur që e kishte hartuar platformën akademiku nacionalist serb Dobrica Qisiq, dhe tashmë të njëjtin kontigjent të atyre qytetarëve, politika po e shfrytëzon dhe abuzon për interesat e veta, pasi që mërgata është forcuar, stabilizuar dhe paraqet edhe faktor me peshë strategjike e politike për ndërtimin e shtetit dhe të pushtetit në shtetin e Kosovës.
“Mërgata jonë tani është pjesa më vitale e popullit tonë, më vitale sesa pjesa që jeton në Kosovë. Janë më të pakët në numër po falë kushteve të ofruara nga vendet ku jetojnë kanë vitalitet të lartë”, tha analisti Meha për “Kosova Times”.
Madje ai thotë se kjo mërgatë është krijuar kësisoj me politikat e qeverive të partive politike të deritanishme. VV deri tani nuk e kishte pjesën e vetë, tani edhe kjo e ka kontributin e vetë në përbërjen e qytetarëve nga Kosova në emigrim. Përzërja e qytetarëve nga Kosova është program i rrjetit të fshehtë serb-rus i kryer nga alternativat politike të deritanishme përmes kontrollit të tyre brenda partive politike”, tha analisti Meha për “Kosova Times”.
Sidoqoftë, Meha thotë se sikurse në të kaluarën, edhe tani, mërgata- diaspora do të bombardohet me premtime mashtruese.
“Alternativat politike të deritanishme kanë përzënë qytetarët nga Kosova duke u ofruar rrena e mashtrime në vend të ofrimit të zgjidhjes së problemeve të tyre. Rrena dhe mashtrimi janë fuqia e shtetit të Serbisë, e deklaruar haptazi nga akademiku i tyre Dobrica Qosiq”, tha analisti Meha.
Sipas tij, Kjo platformë e veprimit të alternativave të deritanishme e rrenës dhe mashtrimit pritet që të vazhdojë të zbatohet edhe në fushatën me diasporën, ashtu si është zbatuar deri tani në fushatat zgjedhore në Kosovë.
“Nuk pres ndonjë ndryshim, nuk po shoh ndonjë shenjë të mendoj ndryshe”, tha Meha për “Kosova Times”.
