Kryeministri maqedonas dhe përfaqësuesit e koalicionit VLEN paralajmërojnë miratimin e një ligji të ri për përfaqësimin e shqiptarëve në organet shtetërore. Kjo iniciativë vjen pasi Gjykata Kushtetuese e shfuqizoi ligjin për balancuesit.
Kryeministri i Maqedonisë së Veriut, Hristijan Mickoski, ka folur sot në lidhje me ligjin e ri për përfaqësim të drejtë dhe adekuat, për të cilin tha se zgjidhja ligjore duhet të jetë në përputhje me kushtetutën.
“Zgjidhja e re ligjore duhet të jetë kushtetuese dhe duhet të jetë në përputhje me rekomandimet e Komisionit të Venecias. Është më mirë që para se të miratohet në Kuvend, ta dërgojmë për mendim tek ekspertët juridikë”, ka thënë Mickoski.
Kurse Zv.kryeministri Izet Mexhiti ka thënë se në ligjin e ri mënyra e mbikëqyrjes së punësimeve, duhet të vendoset nëse do të bëhet përsëri me balancues apo me ndonjë mënyrë tjetër.
“Pra do të jetë në frymën që të respektohet kategoria kushtetuese e përfaqësimit adekuat dhe i drejtë i bashkësive etnike në Maqedoni, duke mos i dhënë gjykatës kushtetuese që ta abrogon këtë ligj në të ardhmen, siç e ka abroguar disa deri tani. Këtu dalim te problemi esencial që na e kanë lënë trashëgimi partitë shqiptare në qeverisjet e kaluara”, ka thënë Mexhiti.
Gjykata Kushtetuese e Maqedonisë së Veriut gjatë javës së kaluar shfuqizoi “Balancuesin”, mekanizmin që rregullonte përfaqësimin e drejtë dhe adekuat të bashkësive etnike në administratën publike.
