Kritika në adresë të ekzekutivit në Komunën e Prishtinës, sa i përket trajtimit të qenve endacakë, patën nga Vetëvendosje, sipas së cilës Komuna ka dështuar në këtë fushë. Nga Komuna thonë se po merren me këtë shqetësim, derisa kërkuan përkrahje financiare nga niveli qendror.
Opozita në kryeqytet ka adresuar kritika ndaj qeverisjes komunale, sa i përket trajtimit të qenve endacakë. Sipas Vetëvendosjes në Prishtinë, komuna ka dështuar në këtë fushë.
“Ka dështu në këtë aspekt, dhe normal që ne kërkojmë nga komuna që të bëjë sistemimin në mënyrën e duhur që të mos ketë rrezik për qytetarët e Prishtinës”, deklaron Besart Krasniqi, asamblist i VV-së në Prishtinë.
Nga komuna thonë se fatin e qenve endacakë e kanë marrë në dorën e tyre, derisa theksojnë se për të pasur rezultat nevojitet ndihmë financiare nga niveli qendror.
“Kemi dhënë një zotim publik në bazë të buxhetit të paraparë për vitin e ardhshëm që deri në mars të vitit të ardhshëm t;i largojmë nga hapësirat publike dhe ti japim në adoptim apo në strehim të përkohshëm në qendren e strehimit diku rreth 1500 qenë. Edhe ky problem po e merr zgjidhjen e duhur nësë do të kemi mbështetje financiare nga ana e qeverisë”, thotë Bekim Brestovci, drejtor i shërbimeve publike në Prishtinë.
Nga Ministria e Administrimit të Pushtetit Lokal, duke folur për strategjinë dhe planin e veprimit për ta zgjidhur këtë çështje që është miratuar në vitin 2022, thanë se nga ana e Ministrisë së Financave, është bërë një vlerësim i impaktit financiar buxhetor, ku është vlerësuar se Kosova mund ta përballojë një shumë prej 9.8 milionë eurosh.
Sipas zëvendësministrit Arbër Vokrri, kjo shumë është e pamjaftueshme.
“Është e pamundur secilado komunë ta zgjidhë problemin vetë. Nevojitet koordinim prej nivelit qendror, por ajo ende që është më e rendësishme se kjo është çështja e buxhetit. Unë e kam thënë edhe në mbledhje të qeverisë edhe në deklarime publike që shuma prej 9.8 milionëve është e pamjaftueshme”, tha Arbër Vokrri, zëvendësministër i MAPL-së.
Ai tha se pret reflektim dhe ndarje të mjeteve të duhura, në mënyrë që të ketë zgjidhje.
