Prokuroria Speciale e Republikës së Kosovës ka informuar publikun lidhur me një rast të rëndësishëm në fshatin Varagë, Komuna e Zubin Potok-ut, ku më 29 nëntor 2024 janë kryer kontrolle të koordinuara nga Policia e Kosovës dhe Prokuroria Speciale. Gjatë këtyre operacioneve, janë zbuluar dhe sekuestruar armë dhe pajisje të ndryshme të dyshuara se ishin destinuar për veprimtari kriminale.
Në kuadër të aksionit, 10 persona janë shoqëruar në stacionin policor, të dyshuar për veprat penale: “Rrezikimi i rendit kushtetues”, “Kryerja e veprës terroriste”, dhe “Mbajtja pa autorizim e armëve”, në bazë të Kodit Penal të Kosovës.
Dy persona, me inicialet D.V. dhe D.M., nga komuniteti serb, janë ndaluar me vendim të Prokurorit Special. Për të dyshuarin D.V. është caktuar masa e paraburgimit prej një muaji nga Gjykata, ndërsa D.M. është liruar në procedurë të rregullt.
Më 1 dhjetor 2024, është ndaluar edhe i dyshuari J.V., gjithashtu nga komuniteti serb, i cili ishte në kërkim. Gjatë kontrollit në banesën e tij, u sekuestrua një sasi e konsiderueshme armësh dhe pajisjesh të tjera.
Hetimet për këtë rast po vazhdojnë nga autoritetet kompetente, të cilat kanë theksuar përkushtimin e tyre për të garantuar rendin dhe sigurinë publike. /Kosovatimes/
