Ministri për Çështje të Bashkimit Evropian të Hungarisë, Janos Boka, po viziton Kosovën.
Ministri hungarez sot në takime të ndara është pritur nga zëvendëskryeministri për Integrim Evropian, Zhvillim dhe Dialog i Republikës së Kosovës, Besnik Bislimi dhe këshilltari politik i kryeministrit Kurti, Jeton Zulfaj.
“Në maj u takuam në Budapest, tani takimi ynë ishte në Prishtinë. Së bashku me Janos Boka folëm për perspektivën evropiane të Kosovës, ndërsa ritheksova përkushtimin dhe gatishmërinë tonë për të arritur progres të rëndësishëm në një proces të integrimit në BE të bazuar në merita”, ka shkruar Bislimi në ‘X’.
Edhe Boka ka shkruar në platformën ‘X’ se me Besnik Bislimin ka diskutuar veprimet që duhen ndërmarrë për ta sjellë Kosovën një hap më afër Bashkimit Evropian.
“Presidenca hungareze po punon për një politikë zgjerimi të bazuar në merita, të balancuar dhe të besueshme. Këtë e theksova gjatë bisedave të mia në Prishtinë”, ka shkrua ai në ‘X.
Boka gjatë vizitës në Prishtinë është takuar edhe me këshilltarin politik të kryeministrit Kurti, Jeton Zulfaj.
“Stabiliteti i Ballkanit Perëndimor është në interes jo vetëm të Hungarisë, por edhe të Bashkimit Evropian, ai kontribuon në sigurinë e kontinentit dhe përmirëson konkurrencën tonë. E kam diskutuar këtë me JetonZulfaj”, shkroi Boka në ‘X’.
Ministri për Çështje të Bashkimit Evropian të Hungarisë, Janos Boka, do të ketë takim edhe me akterë të tjerë politik e shoqëror në Kosovës.
